საქართველოს პარლამენტმა ის საინიციატივო ჯგუფი დაარეგისტრირა, რომელიც საქართველოს კონსტიტუციის ყველა ნორმაში, სადაც საკონსტიტუციო სასამართლოა ნახსენები, სიტყვა "საკონსტიტუციოს" ამოღებას ითხოვს.

კანონპროექტის განმარტებითი ბარათის მიხედვით, კანონპროექტის შემუშავების საფუძველი "საკონსტიტუციო სასამართლოს მხრიდან საქართველოს პარლამენტის კომპეტენციაში შეჭრა" გახდა.

ინიციატივის ავტორი 16 მოქალაქეა, მათ შორის არიან ლალი მოროშკინა, ყოფილი პარლამენტარი კობა დავითაშვილი და პატრიოტთა ალიანსის დეპუტატი, პარლამენტის ვიცე-სპიკერი, ირმა ინაშვილი.

ინიციატორები საკონსტიტუციო სასამართლოს კომპეტენციების საერთო სასამართლოებისთვის გადაცემას ითხოვენ.

იგივე საინიციატივო ჯგუფი კონსტიტუციის იმ მუხლის შეცვლასაც ითხოვს, რომლითაც მარიხუანის მოხმარება ლეგალური გახდა.

კანონპროექტის დარეგისტრირებისა და მიღების შემთხვევაში, სახელმწიფოს საშუალება ექნება კონკრეტულ შემთხვევებში შეზღუდოს კონსტიტუციით გათვალისწინებული პიროვნების თავისუფალი განვითარების უფლება.

კანონპროექტი პარლამენტში ოფიციალურად დარეგისტრირებული არ არის. საპროცედურო საკითხთა კომიტეტის თავმჯდომარის გიორგი კახიანის განცხადებით, 13 სექტემბრის სხდომაზე მხოლოდ საინიციატივო ჯგუფი დაარეგისტრირეს, რომლებიც ვალდებულები არიან მოაგროვონ 200 000 ხელმოწერა. პარლამენტი კანონპროექტს მხოლოდ ხელმოწერების შეგროვების შემდეგ დაარეგისტრირებს.