საქართველოს განათლების მინისტრი, მიხეილ ბატიაშვილი რეფორმის ხედვის პრეზენტაციას ხვალ, 14 სექტემბერს, 11 საათზე გამართავს. ამ შინაარსის ანონსი უწყების პრესსამსახურმა პრეზენტაციის წინა დღეს, დღეს, 13 სექტემბერს დააგზავნა.

მიხეილ ბატიაშვილი მინისტრად ივლისში დაინიშნა. მინისტრობის ორი თვის თავზე, 10 სექტემბერს მან გამოცდების ეროვნული ცენტრის ხელმძღვანელი, მაია მიმინოშვილი და განათლების ხარისხის განვითარების ცენტრის დირექტორი, თამარ სანიკიძე გაათავისუფლა.

გარდა ამისა, თანამდებობიდან გაათავისუფლეს განათლების, მეცნიერების, კულტურისა და სპორტის მინისტრის მოადგილეები, თემურ მურღულია და ლია გიგაური.

მინისტრის განცხადებით, თანამდებობიდან ასევე გაათავისუფლეს მასწავლებელთა პროფესიული განვითარების ეროვნული ცენტრის დირექტორი, გიორგი მაჩაბელი და შოთა რუსთაველის ეროვნული სამეცნიერო ფონდის დირექტორი, მანანა მიქაბერიძე. სამინისტროში მოადგილეების რაოდენობა 7-დან 5-მდე შემცირდა.

მინისტრმა მასშტაბური საკადრო ცვლილებები სისტემაში არსებული პრობლემებით ახსნა:

"სისტემაში არსებულ პრობლემებთან დაკავშირებით გავაკეთე განცხადება. პირველივე დღიდან სისტემაში პრობლემებს ვხედავდი. ეს არ არის საბოლოო და ცვლილებები გაგრძელდება. ეს არის მნიშვნელოვანი წინაპირობა, რომ უსწრაფესი ნაბიჯებით დავიწყოთ ნაბიჯების განხორციელება. ახალმა გუნდმა ახალი ენერგიით უნდა შეძლოს პრობლემების გადაჭრა", - განაცხადა მიხეილ ბატიაშვილმა.