საქართველოს პარლამენტის ჯანდაცვის კომიტეტის თავმჯდომარის, აკაკი ზოიძის განცხადებით, თუ კანონმდებლები დაარწმუნებენ სასულიერო პირებს, რომ მარიხუანას კულტივაცია მხოლოდ სამედიცინო მიზნებისთვის მოხდება, მაშინ ეკლესია მთავრობას წინააღმდეგობას არ გაუწევს.

იმ შემთხვევაში კი თუ ეკლესიას ვერ დაარწმუნებენ კანონმდებლებს რთული გადაწყვეტილების მიღება მოუწევთ.

კითხვაზე, მიიღებენ თუ არა კანონს ეკლესიის ნების საწინააღმდეგოდ, აკაკი ზოიძე პასუხობს, რომ გადაწყვეტილება არა მხოლოდ ეკლესიის, არამედ სხვა ყველას აზრის გათვალისწინებით უნდა იყოს მიღებული.

"დიდი ბოდიში, საჯარო სივრცეა, ეკლესიის აზრს დიდი მნიშვნელობა აქვს, მაგრამ ჩვენ ვართ კანონმდებლები. ჩვენ უნდა მივიღოთ გადაწყვეტილება ყველა სხვა ფაქტორის გათვალისწინებით და არა მხოლოდ ეკლესიის აზრის", - განაცხადა აკაკი ზოიძემ.

მღვდელმთავრებმა მარიხუანის თემასთან დაკავშირებით კონფერენციაზე იმსჯელეს. მათი პოზიცია ერთსულოვანია. ეკლესია მარიხუანის კულტივაციასა და მოხმარების ლეგალიზაციას ეწინააღმდეგება. შეხვედრაზე მთავრობის მისამართით ულტიმატუმებიც გაისმა. მეუფე იაკობმა ხელისუფლება გააფრთხილა, რომ კანონის მიღების შემთხვევაში, ეკლესია საკუთარ ძალას აჩვენებდა.

30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რომლის მიხედვითაც მარიხუანის მოხმარებისთვის ადმინისტრაციული სასჯელი გაუქმდა. შინაგან საქმეთა სამინისტრომ მარიხუანის მოხმარების კანონპროექტზე სწორედ ამის შემდეგ დაიწყო მუშაობა.

ჯანდაცვის კომიტეტის თავმჯდომარის, აკაკი ზოიძის განმარტებით, ინიციატივა მმართველმა გუნდმა 10 სექტემბერს, უმრავლესობის სხდომაზე განიხილა, ინფორმაცია შინაგან საქმეთა სამინისტრომაც დაადასტურა.