ზაზა სარალიძე ღამით ინგოროყვას კლინიკაში რჩება. როგორც On.ge-ს კლინიკის პრესსამსახურში განუცხადეს მისი მდგომარეობა სტაბილურია, თუმცა საჭიროებს დამატებით გამოკვლევებს.

"ჰიპერგლიკემია და ჰიპობოლემიური მდგომარეობა. პაციენტთან მიმდინარეობს კორექცია, ამ დროისათვის მდგომარეობა არის სტაბილური, თუმცა საჭიროებს დამატებით გამოკვლევებს და მონიტორინგს დინამიკაში. ზემოაღნიშნულიდან გამომდინარე პაციენტი რჩება კლინიკაში".

სარალიძე კლინიკაში მას შემდეგ გადაიყვანეს, რაც აქციაზე პოლიციასთან დაპირისპიების დროს ცუდად გახდა. სარალიძე მალხაზ მაჩალიკაშვილთან ერთად მეორე დღეა შიმშილობდა.

შვილმკვდარი მამების, ზაზა სარალიძისა და მალხაზ მაჩალიკაშვილის მხარდამჭერ აქციაზე, წვიმის გამო აქციის მონაწილეები კარვის გაშლას ცდილობდნენ. ადგილზე მყოფმა სამართალდამცავებმა მათ კარვის გაშლის უფლება არ მისცეს, რასაც აქციის მონაწილეებსა და პოლიციას შორის დაპირისპირება მოყვა. პოლიციამ კარვის ნაწილები ტერიტორიიდან გაიტანა.

დაპირისპირებისას სარალიძემ სამართალდამცავებს მოკლული შვილის, დათო სარალიძის ფოტო აჩვენა და მოუწოდა გაეთელათ ის ფეხქვეშ. სარალიძის თქმით, მათი საქციელი სწორედ ამას ნიშნავდა.

სარალიძის საავადმყოფოში გადაყვანის შემდეგ აქცია გაგრძელდა. მაჩალიკაშვილის თქმით, არ დაიშლებიან სანამ ყველა მოთხოვნა არ შესრულდება.