"ვფიქრობდი და მეგონა, რომ მთელი საქართველო წუხდა და მთელი საქართველო გამოვიდოდა. დღეს მე იმედიც დამეკარგა, საქართველო კიარა პატარა სოფლის ხალხიც არ გამოდის. არც გუშინ გამოსულან, არც დღეს", - ამ სიტყვებით მიმართა სპეცოპერაციის დროს მოკლული თემირლან მაჩალიკაშვილის მამამ, მალხაზ მაჩალიკაშვილმა დღეს აქციიდან საზოგადოებას. მაჩალიკაშვილმა მოუხოდა ხალხს გაერთიანდნენ დანაშაულებრივი ჯგუფის წინააღმდეგ და დაეხმარონ მათ სამართლიანობისთვის ბრძოლაში.

"ჩვენ დასაკარგი უკვე დავკარგეთ, რისიც გვეშინოდა ყველაზე მეტად ის მოხდა. ამის შემდეგ მე და ზაზას არანაირი შიში არ გვაქვს. ჩვენ რასაც ვაკეთებთ იმიტომ რომ მომავალ თაობას ჰქონდეს მშვიდი ცხოვრება, როგორც შეეფერება საქართველოს, ქართველ ერს იმ მომავლით იცხოვრონ. ჩვენ შვილებს ვერ დავიბრუნებთ და ვერ გავაცოცხლებთ", - განაცხადა მაჩალიკაშვილმა.

მაჩალიკაშვილმა მადლობა გადაუხადა პარლამენტთან შეკრებილ მხარდამჭერებს და კიდევ ერთხელ მოუწოდა საზოგადოებას, რომ განურჩევლად რელიგიური კუთვნილებისა დაუდგნენ მათ გვერდით.

სარალიძისა და მაჩალიკაშვილის აქციები მას შემდეგ დაიგეგმა, რაც საპარლამენტო უმრავლესობამ მხარი არ დაუჭირა საპარლამენტო კომისიის დასკვნას დავით სარალიძის მკვლელობის საქმეზე.

აქცია გუშინ, 10 სექტემბერს დაიწყო და დღეს განახლდა. სარალიძემ განაცხადა, რომ ხელისუფლებას თანამდებობის დასატოვებლად ვადას 24 საათ აძლევდა.