საქართველოს პრეზიდენტის საპარლამენტო მდივანი ანა ნაცვლიშვილი "სახელმწიფო დაცვის სპეციალური სამსახურის შესახებ" კანონში მომზადებულ ცვლილებებს ეხმაურება, რომლის მიხედვითაც პრეზიდენტს სიცოცხლის ბოლომდე სახელმწიფო დაცვა აღარ ეყოლება.

როგორც ანა ნაცვლიშვილი აცხადებს, აღნიშნული ცლილებების მიზანია დააკნინოს პრეზიდენტის ინსტიტუტი, შეიზღუდოს პრეზიდენტის უსაფრთხოება და ეს გარანტირებული იყოს არა კანონით, არამედ დამოკიდებული იყოს მთავრობის ნებაზე.

"იმ კონსიტიტუციით, რომელიც არჩევნების შემდეგ შევა ძალაში, პრეზიდენტი ზეპარტიული ფიგურაა და ახლა ამ ზეპარტიული პრეზიდენტის უსაფრთხოების საკითხი უნდა გადაწყვიტოს პოლიტიკური უმრავლესობის მიერ დაკომპლექტებულმა მთავრობამ".

სახელმწიფო დაცვის სპეციალური სამსახურის შესახებ კანონში დაგეგმილი ცვლილებებით, უფლებამოსილების ვადის გასვლის/შეწყვეტის შემდეგ საქართველოს პრემიერ-მინისტრის, საქართველოს პრეზიდენტისა და საქართველოს პარლამენტის თავმჯდომარისთვის სავალდებულო წესით დაცვის შენარჩუნება გათვალისწინებულია ერთი წლით.

ცვლილების თანახმად, ვადის გასვლიდან ან უფლებამოსილების შეწყვეტიდან ერთი წლის გასვლის შემდეგ დაცვა შეიძლება დაენიშნოთ საქართველოს მთავრობის გადაწყვეტილებით შესაბამისი საფრთხის არსებობის საფუძველზე.