დიდი ბრიტანეთის პოლიციამ სოლსბერიში სკრიპალების მოწამვლაში რუსი ბრალდებულების ვინაობა დაასახელა. ესენი არიან ალექსანდრ პეტროვი და რუსლან ბოშიროვი. სკოტლანდ იარდის განმარტებით, ბრალის წასაყენებლად საკმარისი საფუძველი არსებობს.

მათივე თქმით, ბრალდებულების დასაკავებლად ევროპული ორდერი გამოსცეს, თუმცა მათ ექსტრადირებას არ მოითხოვენ.

"ჩვენ არ მივმართავთ რუსეთს მათი ექსტრადიციის მოთხოვნით, რადგან რუსეთის კონსტიტუცია საკუთარი მოქალაქეების ექსტრადირებას კრძალავს", - განაცხადა პროკურატურის წარმომადგენელმა.

სერგეი სკრიპალი შვილთან, იულიასთან ერთად ბრიტანეთის ქალაქ სოლსბერიში 4 მარტს მოწამლეს. ისინი უგონოდ საზოგადოებრივი თავშეყრის ადგილზე მდგარ სკამზე იპოვეს. ბრიტანეთმა მოწამვლაში რუსეთი დაადანაშაულა და საწამლავად ნოვიჩოკი დაასახელა. აღნიშნული საშუალება სასიკვდილო ნივთიერებაა, რომელიც საბჭოთა კავშირმა 1970-80 წლებში გამოუშვა. რუსეთმა საქმეში ყოველგვარი მონაწილეობა უარყო. რამდენიმეკვირიანი კომის შემდეგ ორივე მათგანი გონს მოვიდა და ამჟამად მათ სიცოცხლეს საფრთხე არ ემუქრება.

სკრიპალების საქმეს მოჰყვა დიპლომატიური სკანდალი.დიდი ბრიტანეთის პრემიერ-მინისტრმა, ტერეზა მეიმ ქვეყნიდან რუსი დიპლომატები გააძევა. ლონდონის მხარდასაჭერად მსგავსი ნაბიჯი გადადგა დასავლეთის ზოგიერთმა ქვეყანამ. საპასუხოდ დიპლომატების გაძევება დაიწყო რუსეთმაც. სკრიპალების საქმის გამო აშშ-მ რუსეთს ახალი სანქციები დაუწესა.

გაიგეთ მეტი: სერგეი სკრიპალის საქმე