დე ფაქტო აფხაზეთის თვითგამოცხადებულმა ვიცე-პრეზიდენტმა, ვიტალი გაბნიამ თანამდებობა დატოვა. ჟურნალისტებთან კი ამის მიზეზად ის დაასახელა, რომ კანონის ფარგლებში საკუთარი ღირსების დაცვა არ შეუძლია.

Кавказ.Реалии-ის ინფორმაციით, რამდენიმე დღის წინ ვიცე პრეზიდენტს თანაპარტიელმა თავში ჭიქა ჩაარტყა. გაბნია ამბობს, რომ კონფლიქტი პოლიტიკური შინაარსის იყო, თუმცა არ ასახელებს პირს, რომელმაც მას ფიზიკური შეურაცხყოფა მიაყენა.

გადადგომის განცხადებაში გაბნიამ მოუწოდა დე ფაქტო პრეზიდენტ ხაჯიმბას არ წამოაყენოს თავისი კანდიდატურა მომდევნო საპრეზიდენტო არჩევნებზე. მისი თქმით, უკეთსია თუ ხაჯიმბა წინამორბედის შეცდომებს არ დაუშვებს და ამ ნაბიჯით დაძაბულობას გაანეიტრალებს.

გარდა ამისა, გაბნიამ მოუწოდა ხალხს არ მიიღონ მონაწილეობა ანტისამთავრობო მიტინგებში, რომელიც 7-9 ოქტომბერსაა დაგეგმილი.