შავი ზღვის საერთაშორისო უნივერსიტეტის სტუდენტების ნაწილმა პროტესტის ნიშნად განათლების მინისტრთან, მიხეილ ბათიაშვილთან შეხვედრა დატოვეს. როგორც უნივერსიტეტის სტუდენტმა, ნიკა ლეთოდიანმა ჟურნალისტებთან განმარტა, მათ კითხვებზე კონკრეტული პასუხები ვერ მიიღეს.

"რა კითხვებიც ჩვენ დავუსვით მინისტრს, მან განაცხადა, რომ ეს არ იყო მისი კომპეტენცია. ეხებოდა ეს ფინანსებს თუ სამართლებრივ საკითხებს. მან განგვიმარტა, რაც ეწერა დასკვნაში", - განაცხადა ლეთოდიანმა.

ავტორიზაციის საბჭოს გადაწყვეტილებით, შავი ზღვის საერთაშორისო უნივერსიტეტს ავტორიზაცია 6 წლით გაუგრძელდა, თუმცა სასწავლებელი 2019 წლის 20 აგვისტომდე სტუდენტებს ვერ მიიღებს. გადაწყვეტილების გასაპროტესტებლად IBSU-ს სტუდენტებმა განათლების სამინისტროსთან აქცია გამართეს. ისინი დასკვნას უსამართლოსა და უსაფუძვლოს უწოდებენ.

განათლების ხარისხის განვითარების ეროვნული ცენტრის ხელმძღვანელი თამარ სანიკიძე მიიჩნევს, რომ შავი ზღვის უნივერსიტეტისთვის სტუდენტების მიღების შეზღუდვის გადაწყვეტილება კანონიერი იყო.

უნივერსიტეტის საზოგადოებასთან ურთიერთობის სამსახურის ცნობით, ავტორიზაციის საბჭოს გადაწყვეტილების გაცხადებული მიზეზი ისაა, რომ შავი ზღვის საერთაშორისო უნივერსიტეტს 2013 წელს დაეკისრა საგადასახადო ჯარიმა (ჯარიმის ოდენობა ამჟამად 700 000 ლარია და მისი სამართლიანობის შესახებ მიმდინარეობს სასამართლო დავა). ჯარიმიდან გამომდინარე, უნივერსიტეტის ქონებას ადევს ყადაღა.

"უნივერსიტეტი მზადაა სასამართლო დავის წაგების შემთხვევაში დაფაროს საგადასახადო ჯარიმა. ხაზგასასმელია, რომ შემოსავლების სამსახურის 2018 წლის 4 ივნისის ბრძანებით (#025-152) გაუქმდა უნივერსიტეტის ქონებაზე დადებული ყადაღა. აღნიშნული დოკუმენტი ავტორიზაციის საბჭოს წარედგინა, თუმცა საბჭომ ეს ფაქტობრივი მდგომარეობა არ გაითვალისწინა", - ნათქვამია განცხადებაში.

IBSU-ში მიაჩნიათ, რომ საბჭოს პოზიცია არის უსაფუძვლო და უსამართლო შემდეგი მიზეზების გამო:

  • შავი ზღვის საერთაშორისო უნივერსიტეტის უძრავი ქონება და სხვა აქტივები მრავალჯერ აღემატება 700 000 ლარს;
  • ავტორიზაციის საბჭოს მიერ მიღებული გადაწყვეტილება მხოლოდ მიმდინარე წელს 2 მილიონ ლარამდე ამცირებს უნივერსიტეტის შემოსავალს (რაც მრავალფეროვან საგანმანათლებლო მიზნებს მოემსახურებოდა).

განათლების ხარისხის ეროვნული ცენტრის განცხადებით, იმ სტუდენტებისთვის, რომლებისთვისაც შავი ზღვის საერთაშორისო უნივერსიტეტი პრიორიტეტი იყო, სტუდენტთა ელექტრონულ ფორმატზე მობილობისთვის სპეციალური რეგისტრაციის გავლა მოუწევს.