სპორტისა და ახალგაზრდულ საქმეთა კომიტეტის თავმჯდომარის, შოთა ხაბარელის თქმით, ქართველი მოჭიდავეების მიერ ჩრდილოეთ ოსეთის დეპუტატის და რუსეთის ნაკრების მთავარი მწვრთნელის, ჯაბო თადეევის სახიანი მაისურის ჩაცმას არანაირი პოლიტიკური დატვირთვა არ ჰქონია.

"გამოხატულია მაისურზე ის მსოფლიო ჩემპიონი, რომელიც არის ბიჭების მეგობარი, მით უმეტეს, მაგათ ტრადიციები აქვთ, ყველა ასეთ შეჯიბრებებზე მაისურებით გამოდიან თავის წარმატებულ სპორტსმენს აკრავენ",- განაცხადა ხაბარელმა რუსთავი 2-თან საუბარში.

მისივე თქმით, მაისურების ჩაცმა არასასიამოვნო ფაქტია, თუმცა მოჭიდავეების მხრიდან მიზანმიმართული ქმედება არ ყოფილა. ხაბარელი შემთხვევას პატარა, უყურადღებო ინციდენტს უწოდებს.

"შეიძლება ეს იყოს მაგალითი შემდგომისთვის, რომ ყველამ გაამახვილა ყურადღება და ასეთი შეცდომა აღარ დაუშვან", - აღნიშნა დეპუტატმა.

ინფორმაცია და ფოტო თედეევის შესახებ On.ge-მ გაავრცელა. ფოტოზე, რომელიც On.ge-ს მკითხველმა მიაწოდა საქართველოს ჭიდაობის ეროვნული ნაკრების მთავარი მწვრთნელი, გიორგი იანტბელიძე და მოჭიდავეები გენო პეტრიაშვილი, ზურაბ იაკობაშვილი და მამუკა ერაძე არიან. მათ რუსეთის დროშისფერიანი მაისურები აცვიათ, რომელზეც ჩრდილოეთ ოსეთის პარლამენტის დეპუტატისა და რუსეთის ნაკრების მთავარი მწვრთნელის, ძამბოლატ (ჯაბო) თედეევის სახეა დაბეჭდილი.

თედეევი ჩრდილოეთ ოსეთის პარლამენტში ფრაქცია რუსი პატრიოტების წარმომადგენელია. მას ოსეთის გმირისა და ქვეყნის წინაშე დამსახურებისთვის სხვადასხვა ჯილდოები აქვს მიღებული.