ნიუ-იორკის უნივერსიტეტი (NYU) აცხადებს, რომ მედიცინის სტუდენტებს სწავლის გადასახადს დაუფარავს. შეთავაზებით შეუძლიათ ისარგებლონ როგორც ამჟამინდელმა, ისე მომავალმა სტუდენტებმა, იმის მიუხედავად, ექნებათ თუ არა გადახდის შესაძლებლობა.

2018-2019 აკადემიურ წლებში, ეს გადასახადი თითოეულ სტუდენტზე 55 018 დოლარს შეადგენს.

ამ განცხადებით, NYU პირველი პრესტიჟული უნივერსიტეტი გახდება, რომელიც სტუდენტის სრულ გადასახადს დაფარავს სამედიცინო ფაკულტეტზე. ამერიკის მასშტაბით, მედიცინის ფაკულტეტის სტუდენტების 83 პროცენტს 100 ათასი დოლარის, ან მეტი ოდენობის სესხები აქვთ.

"ეს ჩვენი სტუდენტების ცხოვრებას ბევრად შეცვლის. ჩვენ ვფიქრობთ, რომ მათ სამედიცინო ფაკულტეტზე სწავლის პროცესში სტრესისგან ნაწილობრივ მაინც გავათავისუფლებთ", - ამბობს უნივერსიტეტის დირექტორი.

ნიუ-იორკის უნივერსიტეტს 11 წელი დასჭირდა შემოწირულობით იმ თანხის შესაგროვებლად, რომლითაც სტუდენტებს აღნიშნულ შეთავაზებას წარუდგენდა. ჯამში უნივერსიტეტმა 450 მილიონ დოლარზე მეტი შეაგროვა.

უნივერსიტეტმა ცოტა ხნის წინ სტუდენტებს მეოთხე სასწავლო წლის გამოტოვება უკვე შესთავაზა, რომელიც დამატებითი სპეციალობების სწავლას ხმარდებოდა, რაც სტუდენტებს გადასახადის ერთი წლისგან ათავისუფლებდა და სხვადასხვა პროგრამებზე დარეგისტრირების შანსს აძლევდა. აღნიშნული შეთავაზება ბოლო წელს სტუდენტების 20%-მა გამოიყენა.

უნივერსიტეტის წარმომადგენლებს იმედი აქვთ, რომ იმ აბიტურიენტებს, რომლებიც სამედიცინო ფაკულტეტზე გადასახადის გამო არ აბარებდნენ, ცვლილება მოტივაციას გაუზრდის.