ახალგაზრდა ქართველი მწერალი, სცენარისტი და რეჟისორი, ივა ფეზუაშვილი, აიოვას მწერალთა საერთაშორისო პროგრამაში მიიღებს მონაწილეობას. ბოლო 14 წლის განმავლობაში ივა ფეზუაშვილი პირველი ქართველი ავტორია, რომელიც ამ პროგრამაში ჩაერთვება.

ამის შესახებ ინფორმაცია თბილისში აშშ-ის საელჩოს ფეისბუქ გვერდზე გავრცელდა.

ივა ფეზუაშვილი ამერიკაში დღეს, 16 აგვისტოს მიემგზავრება და იქ სამ თვის განმავლობაში ისწავლის. ამის შესახებ მწერალმა On.ge-სთან საუბრისას განაცხადა.

"ამერიკაში დღეს მივდივარ და იქ სამი თვის განმავლობაში ვიქნები. ვფიქრობ, რომ ეს იქნება დიდი გამოცდილება ჩემთვის, როგორც მწერლისთვის", - ამბობს ის.

ქართველმა მწერალმა კონკურსში საკუთარი CV და ინგლისურად ნათარგმნი მოთხრობები გააგზავნა, რის შემდეგაც სამ საუკეთესო ქართველ ნომინანტს შორის მოხვდა. საერთაშორისო ჟიურიმ კი, 30 ქვეყნის წარმომადგენლებს შორის ერთ-ერთ გამარჯვებულად ივა ფეზუაშვილი გამოავლინა.

28 წლის მწერლის აზრით, აიოვას მწერალთა საერთაშორისო პროგრამაში მოხვედრა ერთგვარი აღიარებაა მისთვის. ის ამბობს, რომ ეს პროგრამა საშუალებას მისცემს გაიცნოს უცხოელი მწერლები, გაიზიაროს მათი გამოცდილება და განვითარდეს.

"ჩემთვის საინტერესოა ისიც, რომ ამ პროგრამაში 30 ქვეყნიდან ჩამოსული მწერლები მიიღებენ მონაწილეობას, რაც ახალ კულტურებთან გაცნობის საშუალებასაც მომცემს. ეს ერთ-ერთი საუკეთესო ნაწილია, რასაც ეს პროგრამა მომცემს", - ამბობს ივა ფეზუაშვილი.

ქართველი მწერალი აიოვაში თავისი რომანის დასრულებასაც გეგმავს. მისი აზრით, აშშ-ში გატარებული დრო დაეხმარება, რომ ნაწარმოები, რომელზეც ახლახან დაიწყო მუშაობა, დაასრულოს.

"აიოვაში ვფიქრობ, რომ ჩემი რომანი, რომლის წერაც ახლახან დავიწყე, უნდა დავასრულო. ეს არის ჩემთვის პრიორიტეტული გეგმა და იმედია, ყველაფერი გამომივა", - გვითხრა კონკურსში გამარჯვებულმა მწერალმა.

აიოვა იუნესკოს მიერ ლიტერატურის დედაქალაქად აღიარებული ქალაქია. ეს წოდება აიოვას სწორედ მწერალთა საერთაშორისო პროგრამამ მოუტანა. 2004 წელს ამავე პროგრამაში მონაწილეობას იღებდა მწერალი სულხან ჟორდანია.