ქართული ოცნება უზენაესი სასამართლოს თავმჯდომარეობის კანდიდატის შესარჩევად პრეზიდენტ გიორგი მარგველაშვილს აღარ შეხვდება.

საპარლამენტო უმრავლესობის წარმომადგენელი, თამარ ჩუგოშვილი ამბობს, რომ პრეზიდენტის ადმინისტრაციამ "კინკლაობა" უწოდა მათთან საუბარს:

"უმრავლესობა არის ის ჯგუფი, ვინც უნდა მიიღოს გადაწყვეტილება უზენაესის თავმჯდომარის დანიშვნასთან დაკავშირებით. ასეთი დამოკიდებულებით აზრი არ ექნება, ფორმალობა იქნება ჩვენი საუბარი და რეალურად, რეალური კონსულტაციები, რომლის ფარგლებშიც უნდა ჩამოყალიბდეს ორი მთავარი სუბიექტი - პრეზიდენტი და პარლამენტის უმრავლესობა კანდიდატთან დაკავშირებით, ვერ მოხერხდება, როგორც ჩანს".

ჩუგოშვილის თქმით, პრეზიდენტს შეუძლია, თავად გააგრძელოს პროცესი, წარადგინოს კანდიდატურა და კანდიდატურიდან გამომდინარე მიიღებს გადაწყვეტილებას საპარლამენტო უმრავლესობა:

"თითქმის ყველა მნიშვნელოვან პოზიციაზე კანდიდატები, რომლებიც იყვნენ პრეზიდენტის მხრიდან წარმოდგენილები, იყვნენ მისი ადმინისტრაციის თანამშრომლები, ეს გარკვეულ სკეპტიციზმს გვიჩენს. ჩვენ არ გვინდა აპრიორი წინააღმდეგობა გამოვუცხადოთ ამ პროცესს, უბრალოდ, ჩვენი ჩართვის შედეგს ვერ ვხედავთ".

პრეზიდენტ მარგველაშვილის თქმით, უზენაესი სასამართლოს თავმჯდომარის კანდიდატის შერჩევის პროცესში მთელი საზოგადოების ჩართვას აპირებს.

უზენაესი სასამართლოს თავმჯდომარე ნინო გვენეტაძე დღეს, 2 აგვისტოს გადადგა. როგორც უზენაესი სასამართლოს განცხადებაშია ნათქვამი, მისი გადადგომა ჯანმრთელობის მდგომარეობას უკვაშირდება, რომელიც საზღვარგარეთ რამდენიმეთვიან მკურნალობას მოითხოვს.