10 აგვისტოს ბუქარესტში საპროტესტო აქციაზე პოლიციასთან შეტაკების დროს სულ მცირე 400 ადამიანი დაშავდა. 65 ადამიანი საავადმყოფოში გადაიყვანეს. დაშავებულთაგან 24 ჟანდარმერიის თანამშრომელია. სულ საპროტესტო აქციაში 60 ათასზე მეტმა ადამიანმა მიიღო მონაწილეობა.

საპროტესტო აქცია რუმინეთის მმართველი სპციალ-დემოკრატიული პარტიის წინააღმდეგ იყო მიმართული. ერთ-ერთი მთავარი როლი აქციის მოწყობაში რუმინეთის ემიგრანტებმა ითამაშეს, ბევრი მათგანი ქვეყანაში ჩავიდა და დემონსტრაციაში მიიღო მონაწილეობა.

ისინი აპროტესტებდნენ კორუფციასა და დაბალ შემოსავალს, ასევე, მმართველ პარტიას სასამართლო სისტემის შესუსტებაში ადანაშაულებდნენ. მომიტინგეები ვადამდელი საპარლამენტო არჩევნების დანიშვნას ითხოვდნენ.

ჟანდარმერიის ქმედება დაგმო რუმინეთის პრეზიდენტმა. მისი თქმით, პოლიტიკური შეხედულების მიუხედავად, ყველა ადამიანს აქვს პროტესტის უფლება. მან ჟანდარმერიის ქმედებას სასტიკი და არაპროპორციული უწოდა.