ხორავას ქუჩის საქმეზე დანაშაულის შეუტყობინებლობისთვისა და დაფარვისთვის ბრალდებულ სამი პირს აღკვეთის ღონისძიების სახით გირაო შეეფარდათ. თითოეულ მათგანს სამიათასლარიანი გირაო შეეფარდა.

ერთ-ერთი ადვოკატის, მერაბ მამულაძის განმარტებით, სასამართლოზე დაყენდა შუამდგომლობა, რომ აღარ არსებობდა მოწმეებზე ზემოქმედების საფრთხე, ვინაიდან ძირითადი მოწმეები უკვე დაიკითხნენ. ადვოკატის თქმით, ბრალდებულებისთვის პატიმრობის გაგრძელების საფუძველი არ არსებობდა.

ბრალდების მხარე სასამართლოს გადაწყვეტილებას არ ეთანხმება. პროკურორი გიორგი ქობულაძის თქმით, აღნიშნულთან დაკავშირებით საჩივრის შეტანა შესაძლებელია შემაჯამებელ გადაწყვეტილებასთან ერთად და ამ ეტაპზე მიღებულ გადაწყვეტილებას ვერ გაასაჩივრებენ.