არსენალის ერთ-ერთი მფლობელი, მილიარდერი ალიშერ უსმანოვი თანახმაა, რომ საკუთარი 30%-იანი წილი სტენ კროენკეს მიჰყიდოს.

კროენკე ამჟამად ლონდონური კლუბის 67%-ის მფლობელია. მან დღეს განაცხადა, რომ დარჩენილი წილების შესყიდვაც უნდოდა.

უსმანოვი წლების განმავლობაში აღნიშნავდა, რომ მას თავად სურდა საკონტროლო პაკეტის შეძენა, რათა კლუბისთვის ძვირადღირებული ტრანსფერების საშუალება მიეცა, თუმცა მან ამის უფლება ვერ მოიპოვა, დღეს კი, როგორც ჩანს, საბოლოოდ მიიღო გადაწყვეტილება, რომ საკონტროლო პაკეტზე ბრძოლას ჩამოშორდეს.

"გადავწყვიტე, რომ საკუთარი წილი გავყიდო. ეს ნაბიჯი კლუბს, წესით, უნდა წაადგეს", - აღნიშნა უსმანოვმა.

აღსანიშნავია, მიუხედავად 30 პროცენტიანი წილისა, უსმანოვი კლუბში გადაწყვეტილებებს მაინც ვერ იღებდა.