რუსეთის საგარეო საქმეთა სამინისტროს წარმომადგენელი, მარია ზახაროვა ამბობს, რომ ნატოს "ღირსეული პარტნიორის" სწავლების რეალური ამოცანაა ზეწოლა მოახდინოს რუსეთზე, აფხაზეთსა და სამხრეთ ოსეთზე.

"ჩვენ არ შეგვიძლია დავეთანხმოთ, მათ შორის, საქართველოს თავდაცვის სამინისტროს განცხადებებს, იმაში, რომ ეს სწავლება შავი ზღვის რეგიონში სტაბილურობასა და უსაფრთხოებას ისახავს მიზნად", - განაცხადა ზახაროვამ.

მან, ასევე, დაამატა, რომ სტაბილურობასა და უსაფრთხოებას კონსტრუქციული დიალოგი უზრუნველყოფს და არა - ვერტმფრენები და ტანკები.

"ღირსეული პარტნიორის" სწავლების გამო უკმაყოფილება გამოთქვეს ოკუპირებულ აფხაზეთშიც. ისინი მიიჩნევენ, რომ საქართველოს სამხედრო-ტექნიკური პოტენციალის ზრდა საფრთხეს უქმნის აფხაზეთის დე ფაქტო რესპუბლიკას და სამხრეთ კავკასიაში მშვიდობის საფუძვლებს არყევს.

პირველ აგვისტოს სამხედრო სწავლება "ღირსეული პარტნიორი 2018" ვაზიანის აეროდრომზე გაიხსნა და 15 აგვისტოს ჩათვლის ჩატარდება. მასში ნატოს წევრი და პარტნიორი 13 ქვეყანა მონაწილეობს. საქართველო მრავალეროვან სწავლებას მეოთხედ მასპინძლობს.