ხორავას ქუჩის საქმის დროებით საგამოძიებო კომისიაზე ცნობილი გახდა, რომ ირაკლი შოთაძემ მთავარ პროკურორად ყოფნის დროს მსჯავრდებულის, გ.ბ.-ს დანასთან დაკავშირებით არასწორი ინფორმაცია გაავრცელა.

კერძოდ, მან ბრიფინგზე განაცხადა, რომ გ.ბ.-ს გადამალული დანიდან ამოსულია ორივე მოკლულის დნმ პროფილი. გამოძიებით კი დადგინდა, რომ დანიდან მხოლოდ მოკლული ლევან დადუნაშვილის დნმ-პროფილი ამოიღო, ხოლო დავით სარალიძის დნმ ამოვიდა ხელსახოციდან, რომელშიც გახვეული იყო დანა.

ყოფილმა მთავარმა პროკურორმა კომისიაზე განმარტა, რომ მან განცხადება გაავრცელა ქვემდგომი პროკურორებისგან მოწოდებული ინფორმაციის საფუძველზე და შესაძლოა, მან რაღაც "ვერ მოისმინა".

"ჩემს განცხადებას რაც შეეხება, მე ეს განცხადება გავავრცელე იმ ინფორმაციაზე დაყრდნობით და ეს, შესაძლებელია, გამოწვეული იყოს იქიდან, რომ მე რაღაც ვერ მოვისმინე ან რაღაც დეტალებზე არ გვქონდა საუბარი. შემდგომ დავაზუსტე ეს გარემოება და შემიძლია დაგიდასტუროთ, რომ დავით სარალიძის დნმ პროფილი ამოსულია იმ ხელსახოციდან, რომელშიც გახვეული იყო ის დანა", - განაცხადა ირაკლი შოთაძემ.