ავსტრიის კანცლერი, კრისტენ კერნი მიიჩნევს, რომ თურქეთის ევროკავშირში შესვლასთან დაკავშირებული მოლაპარაკებები უნდა შეწყდეს, რადგან გარდა თურქეთში არსებული პოლიტიკური მდგომარეობისა, ორი მხარის დემოკრატიული და ეკონომიკური მდგომარეობა მკვეთრად განსხვავდება ერთმანეთისგან. ინფორმაციას Politico ადგილობრივ ტელეარხ ORF-ზე დაყრდნობით ავრცელებს.

კერნმა განმარტა, რომ თურქეთი ევროკავშირში არც ახლა გაწევრიანდება და არც მომავალი 10 წლის განმავლობაში. გარდა ამისა, მან ორ მხარეს შორის მოლაპარაკებას "დიპლომატიური ფიქცია" უწოდა და განმარტა, რომ ავსტრია თურქეთის ევროკავშირში გაწევრიანებასთან დაკავშირებული მოლაპარაკების შეწყვეტის შესახებ დისკუსიას 16 სექტემბერს, ევროსაბჭოს შეხვედრაზე გამართავს.

კერნმა ასევე აღნიშნა, რომ თურქეთის ეკონომიკური მდგომარეობა ევროკავშირისას ბევრად ჩამოუვარდება, რაც ზემოაღნიშნულ კონტექსტში ასევე მნიშვნელოვანი საკითხია.

15 ივლისს თურქეთში მომხდარი სახელმწიფო გადატრიალების მცდელობის შემდეგ, ქვეყნის მასშტაბით ათასობით ადამიანი სამსახურიდან გაუშვეს ან დააკავეს. მომხდარის შემდეგ თურქეთის პრეზიდენტმა, რეჯეპ ტაიპ ერდოღანმა ე.წ. წმენდა გამოაცხადა და განმარტა, რომ შესაძლოა ქვეყანაში სიკვდილით დასჯის აღდგენა განიხილონ, რასაც დასავლეთიდან არაერთგვაროვანი გამოხმაურებები მოჰყვა.

უფრო მეტი იხილეთ აქ: