ქალის გაუპატიურებისა და ძარცვის ბრალდებით დაკავებულ ტაქსის მძღოლს აღკვეთის ღონისძიების სახით პატიმრობა შეეფარდა. ამის შესახებ ინფორმაცია პროკურატურამ გაავრცელა.

უწყების ცნობით, 2018 წლის 30 ივლისს, დაახლოებით 03:30 საათზე, დაზარალებული თბილისში, შეშელიძის ქუჩაზე მგზავრობდა ბრალდებულის მართვის ქვეშ მყოფი ტაქსით.

"მგზავრობისას ბრალდებულმა გზის სავალ ნაწილზე გააჩერა ავტომანქანა და ძალის გამოყენებით, ცემით და მუქარით დაამყარა სქესობრივი კავშირი მგზავრთან. ამის შემდეგ, დაზარალებული ეცადა ავტომანქანიდან თავისი კუთვნილი ხელჩანთის აღებას, რა დროსაც ბრალდებულმა ძლიერად ჩაარტყა ხელი სახის არეში. დარტყმის შედეგად დაზარალებული წაიქცა და თავი დაარტყა ბორდიურს, ხოლო ბრალდებული ჩაჯდა ავტომანქანაში და დატოვა შემთხვევის ადგილი ისე, რომ თან წაიღო დაზარალებულის კუთვნილი ხელჩანთა, მასში მოთავსებული ნივთებით", - ვკითხულობთ პროკურატურის განცხადებაში.

გამოძიება ძალადობის, გაუპატიურების და ძარცვის ფაქტებზე, საქართველოს სისხლის სამართლის კოდექსის 126-ე მუხლის 1-ლი ნაწილით, 137-ე მუხლის 1-ლი ნაწილით და 178-ე მუხლის მე-2 ნაწილის ა ქვეპუნქტით მიმდინარეობს. დანაშაული 6-დან 8 წლამდე ვადით თავისუფლების აღკვეთას ითვალისწინებს.