მეცნიერებმა ეპითელური უჯრედების შესწავლისას ბუნებაში ახალი გეომეტრიული ფორმა აღმოაჩინეს.

ახალი აღმოჩენა კარგად ხსნის, თუ როგორ ხდება ჩვენს ორგანიზმში სამგანზომილებიანი სტრუქტურების ერთმანეთთან ეფექტურად განლაგება.

ეპითელური უჯრედები ემბრიონის განვითარებაში დიდ როლს თამაშობენ. სწორედ ეს უჯრედები ქმნიან კანის, სისხლძარღვების და ორგანოების მფარავ ქსოვილებს. ამ პროცესში ეპითელური უჯრედები სხვადასხვა სტრუქტურის შესაქმნელად იღუნებიან და იწელებიან, რაც განსაკუთრებულ მოხერხებულობასა და ელასტიკურობას საჭიროებს.

აქამდე მეცნიერები ფიქრობდნენ, რომ ემბრიონის "საშენ ბლოკებს" წაკვეთილი პირამიდის ფორმა ჰქონდათ, თუმცა ახალმა აღმოჩენამ ყველაფერი შეცვალა. მსგავსი ფორმის სტრუქტურა მეცნიერებმა ბუნებაში პირველად ნახეს.

კომპიუტერული ანალიზის შედეგად დადგინდა, რომ სკუტოიდის ფორმა იდეალურია მცირე ზომაში დიდი ოდენობით უჯრედების ეფექტური განლაგებისთვის. მომავალში მკვლევარებმა სკუტოიდები შეიძლება ხელოვნური ორგანოების გასაზრდელად გამოიყენონ.

ახალ გეომეტრიულ ფორმას ერთ მხარეს ექვსი წახნაგი აქვს, მეორე მხარეს - ხუთი, "პრიზმის" წიბოები კი სამკუთხედს ქმნიან.

ალბათ, ისიც გაინტერესებთ, საიდან მოვიდა სახელი სკუტოიდი. ხოჭოს ჯავშნის, თორაქსის ერთ-ერთ ნაწილს სკუტელუმი ჰქვია. მისი და სკუტოიდის ზედხედი კი ერთმანეთს მნიშვნელოვნად ჰგავს.

შეიძლება, ეს სახელი ამჟამად გეუცნაურებათ, მაგრამ ალბათ, ერთ დროს კვადრატი და რომბიც უცხო სიტყვები იყო.