თბილისის მერიის განცხადებით, შარტავასა და კოსტავას ქუჩებზე ველობილიკი მოეწყობა. როგორც ცნობილია, ველობილიკის ორმხრივი ზოლი ჰოლიდეი ინნთან დაიწყება, სააკაძის მოედანს გაივლის და მთელ შარტავას ქუჩას მოიცავს. ამდენად, პეკინის გამზირისა და კოსტავა-შარტავას ქუჩების ველობილიკები ერთმანეთს დაუკავშირდება და წრეს შექმნის.

გარდა ამისა, სქემა ითვალისწინებს მერიასთან მდებარე ქვეითთა ხიდის დემონტაჟს და მის ნაცვლად ზებრა გადასასვლელის მოწყობას. ქვეითებისთვის, ასევე, ხელმისაწვდომი გახდება სააკაძის მოედნის გაზონი.

კოსტავასა და შარტავას ქუჩებზე საზოგადოებრივი ტრანსპორტისთვის გამოყოფილ ზოლებზე იგეგმება შუქნიშნის პრიორიტეტული სიგნალის შემოღება. მერიის განმარტებით, ეს ავტობუსების შეუფერხებელ და სწრაფ მოძრაობას უზრუნველყოფს.

მერიის თქმით, პროექტი შემდგომ ეტაპზე ავტობუსების ზოლის გმირთა მოედნამდე დაგრძელებას ითვალისწინებს.