ხორავას ქუჩაზე მკვლელობის საქმის შემსწავლელი საგამოძიებო კომისიის წევრებმა ბრალდებულები, მირზა სუბელიანი და თენგიზ კალანდია გამოკითხეს. გამოკითხვა გლდანის მერვე სასჯელაღსრულების დაწესებულებაში შვიდი საათი გაგრძელდა.

კომისიის თავმჯდომარის, სერგი კაპანაძის განცხადებით, გამოკითხვისას ბრალდებულებისგან ბევრი საინტერესო პასუხი მიიღეს, თუმცა დეტალებზე ვერ ისაუბრებს.

"ძირითადი კითხვები ეხებოდა პირველ დეკემბერს განვითარებულ მოვლენებს, ასევე შემდეგ უკვე მათ მონაწილეობას ამ საქმეში, ამა თუ იმ ფორმით. ჩვენ მივიღეთ საკმაოდ საინტერესო პასუხები, რომლის დეტალებს ახლა ბუნებრივია ვერ გავაჟღერებ გამომდინარე იქიდან, რომ ეს ყველა ინფორმაცია უნდა იყოს გაანალიზებული კომისიის მიერ და შემდეგ უნდა იყოს კონტექსტში ჩასმული", - განაცხადა სერგი კაპანაძემ.

კომისიის წევრის, ქართული ოცნების დეპუტატის, ანრი ოხანაშვილის ინფორმაციით, მოპოვებულ ინფორმაციას ჩვენებების საფუძველზე გაანალიზებენ, რომელიც კომისიის დასკვნაში აისახება.

"ძალიან დეტალური შეკითხვები დავსვით და მაქსიმალურად ვეცადეთ მიგვეღო დეტალური ინფორმაცია ბევრ საკითხზე. დავსვით აბსოლუტურად ყველა ის შეკითხვა, რომელიც გაჟღერდა საზოგადოებაში, რომელთა შესახებაც არსებობდა შეკითხვები როგორც დაზარალებული ოჯახის მხრიდან, ასევე საზოგადოების მხრიდან", - განაცხადა ანრი ოხანაშვილმა.

ხორავას ქუჩაზე მომხდარი მკვლელობის საქმის ფარგლებში, მირზა სუბელიანი დანაშაულის შეუტყობინებლობის ბრალდებით, ხოლო თენგიზ კალანდია დანაშაულის დაფარვის ბრალდებით დააკავეს. ორივე მათგან აღმკვეთი ღონისძიების სახით პატიმრობა შეეფარდა.

23 ივლისს გაიმართება საგამოძიებო კომისიის სხდომა, სადაც კომისიის წევრები პროკურატურის წარმომადგენლებს დაკითხავენ.