სირიის საგარეო საქმეთა მინისტრმა, ვალიდ მუალემმა და ცხინვალის საოკუპაციო რეჟიმის წარმომადგენელმა, ე.წ. საგარეო საქმეთა მინისტრმა დიმიტრი მედოევმა დიპლომატიური ურთიერთობების დამყარების შესახებ შეთანხმებას ხელი მოაწერეს. ინფორმაციას საოკუპაციო რეჟიმის საგარეო საქმეთა სამინისტრო ავრცელებს.

განცხადებაში აღნიშნულია, რომ დიმიტრი მედოევმა დამასკოში სირიის საგარეო საქმეთა მინისტრთან გამართა შეხვედრა, რის შემდეგაც დიმიტრი მედოევმა და ვალიდ მუალემმა ხელი მოაწერეს შეთანხმებას დიპლომატიური ურთიერთობების დამყარების შესახებ.

სირიის სახელმწიფო მედიის ცნობით, რუსეთის მიერ ოკუპირებული ცხინვალის ე.წ. საგარეო საქმეთა მინისტრმა კიდევ ერთხელ გადაუხადა მადლობა სირიას ე.წ. სამხრეთ ოსეთის დამოუკიდებელ სახელმწიფოდ აღიარების გამო.

სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად აღიარა. საქართველომ კი პასუხად სირიასთან დიპლომატიური ურთიერთობა გაწყვიტა.

სირიის პრეზიდენტს, ბაშარ ალ-ასადს, სამოქალაქო ომის პერიოდში, რუსეთი ყოველთვის მხარს უჭერდა. პუტინი სირიის ომში კიდევ უფრო აქტიურად მაშინ ჩაერთო, როცა ასადი სამხედრო და ეკონომიკური კუთხით დასუსტდა. რუსული ავია ბომბები ხვდება ისლამური სახელმწიფოს მებრძოლებს, თავდასხმები ასევე ხორციელდება დასავლეთის მიერ მხარდაჭერილ სირიის თავისუფალ არმიასა და მშვიდობიან მოქალაქეებს.

სამხრეთ ოსეთის და აფხაზეთის დე ფაქტო რესპუბლიკა მანამდე აღიარა რუსეთმა, ნიკარაგუამ, ნაურუმ და ვენესუალამ.