საქართველოს კათოლიკოს-პატრიარქი სამებაში მიმდინარე წირვის დროს შეუძლოდ გახდა. ილია მეორე იძულებული გახდა საეკლესიო მსახურობა შეეწყვიტა. ამის შესახებ ინფორმაცია საზოგადოებრივმა მაუწყებელმა გაავრცელა. ექიმის განმარტებით, მომხდარის მიზეზი დაბალი წნევა იყო და პატრიარქის ჯანმრთელობას საფრთხე არ ემუქრება.

"იყო არტერიული წნევის ცვალებადობა. დაქვეითდა არტერიული წნევა, რის გამოც, მან იგრძნო დისკომფორტი. თუმცა, დილიდანვე, ჩვენი რეკომენდაცია იყო, რომ არ წასულიყო წირვაზე, რადგან მთლად დამაკმაყოფილებლად არ გრძნობდა თავს. მაინც წავიდა და ამ დისკომფორტის გამო, იძულებული გახდა დაბრუნებულიყო", - განუცხადა რუსთავი 2-ს ექიმ-კარდიოლოგმა შალვა პეტრიაშვილმა.

ილია მეორე ამჟამად საპატრიარქოში იმყოფება. მედიკოსებმა მისი კლინიკაში გადაყვანა საჭიროდ არ ჩათვალეს.