როგორც მოგეხსენებათ, სულ ცოტა ხნის წინ რობოტი სოფია ფილარმონიაში სიტყვით გამოვიდა. სოფიამ მოხსენება საჯარო სერვისების და ინოვაციების თემაზე "წაიკითხა".

სოფიას ჩამოსვლა სასიამოვნო ამბავია, მაგრამ მოდი ჩამოვთვალოთ კიდევ 10 რობოტი, რომლის საქართველოში ჩამოსვლაც არანაკლებ გაგვიხარდებოდა:

1. კარაქისმომწოდებელი რობოტი Rick and Morty-დან

ფოტო: Rick and Morty

მგონი, ყველა ვთანხმდებით, რომ რიკის შექმნილი კარაქის გადმომწოდებელი რობოტის ყოლა ცხოვრებას ერთიორად გაადვილებდა. განსაკუთრებით დილის საათებში, როდესაც ნახევრად მძინარე მაგიდის არასწორ ბოლოში ჯდებით, კარაქი კი შორსაა.

2. ლუდის დამსხმელი რობოტი Aeolus

ფოტო: http://mirnovinok.com/

რობოტს მაცივრიდან თქვენი რჩეული ლუდის გამოღება და თქვენამდე მოტანა შეუძლია. თუ ბოთლის გასახსნელი დაგრჩათ, არც ეს არის პრობლემა. Aeolus-ს გასახსნელი ყოველთვის თან დააქვს.

3. გრენდაიზერი

ფოტო: siryu / zerochan.net

ალბათ, მართალი იქნება, თუ ვიტყვით, რომ ქვეყანას ერთი გრენდაიზერი მაინც უნდა ჰყავდეს. თანაც ვინ იცის უცხოპლანეტელები თავს როდის დაგვესხმებიან...

4. მოლი

ფოტო: Moley

სახლში გაკეთებული საჭმელი ყველას გვიყვარს. თუმცა შეიძლება ზოგიერთ ჩვენგანს მზარეულობა არ ეხერხება. ამ პრობლემას მალე რობოტები გადაჭრიან. კომპანია Moley Robotics სამზარეულოს რობოტს ქმნის, რომელიც სხვადასხვა საჭმელებს გააკეთებს. კომპანია გაყიდვების დაწყებას წელს აპირებს.

5. Bender

Futurama-ს პერსონაჟ ბენდერზე უკეთ ადამიანებმაც კი არ იციან მხიარულება. ეს გამორჩეული რობოტი მუდმივად ლუდს სვამს, ხუმრობს და ჭანჭიკიან თუ უჭანჭიკო გოგოებს ერთნაირად დასდევს

6. WALL-E

ფოტო: PIXAR ANIMATION STUDIOS

გარემოს დაბინძურების და დანაგვიანების მზარდი პრობლემების გამო სულ მალე გარემოს დამასფუთავებელი რობოტები ალბათ აუცილებლობაც გახდება. განსაკუთრებით კი, თუ მათ ისეთივე საყვარელ თვალებს დაუყენებენ, როგორებიც WALL-E-ს აქვს.

7. Spot

კომპანია Boston Dynamics ცნობილია მისი ოთხფეხა რობოტებით, რომლებსაც ნებისმიერ რელიეფზე შეუძლიათ გადაადგილება. მას გარემოში ნავიგაციისათვის სხვადასხვა სენსორები უყენია და ამის საშუალებით მას დამოუკიდებლად შეუძლია დაბრკოლებებს გვერდი აუაროს. ამ ყველაფერთან ერთად ის საკმაოდ სწრაფია და ტვირთის გადატანაც მოხერხებულად შეუძლია.

8. Jibo

ჯიბო თქვენი პერსონალური ასისტენტია. ის პატარა საყვარელი რობოტია, რომელიც გელაპარაკებათ, დღის ახალ ამბებს გიყვებათ, ის ასევე შეგახსენებთ, რომ დღეს 5-ზე კბილის ექიმთან ხართ ჩაწერილი, ღამე კი ძილინებისას გისურვებთ.

9. რკინის გიგანტი

ფოტო: Warner Bros

რკინის გიგანტი ერთ-ერთი ყველასათვის საყვარელი რობოტი პერსონაჟია. თუ ის ოდესმე ჩვენთან სტუმრობას გადაწყვეტს მან უნდა იცოდეს, რომ ჩვენი ქვეყნის კარი მისთვის ყოველთვის ღიაა.

10. R2-D2

ფოტო: Photofest

ჩვენ არასდროს გვესმოდა, თუ რას ლაპარაკობდა ეს პატარა რობოტი, თუმცა მასთან მეგობრობისთვის სულაც არაა აუცილებელი, მის ენაზე ვლაპარაკობდეთ.