თბილისსა და აჭარის რეგიონში ქურდული სამყაროს წევრობის და ქურდულ შეკრებაში მონაწილეობის ბრალდებით 10 პირი დააკავეს. ამის შესახებ ინფორმაცია შინაგან საქმეთა სამინისტრო ავრცელებს. შსს-ს ცნობითვე, კანონიერ ქურდს მინდია ლავასოღლის, ბრალი დაუსწრებლად წარედგინა.

ამ ბრალდებით დაკავებულები არიან: ივანე გიგიაძე, იმედა აბაშიძე, ჯამბულ ნაკაშიძე, ბეჟან დეკანაძე, მარად წითელაძე, შოთა კეკელიძე, ზაალ ახვლედიანი, რამაზ კომახიძე, ბადრი ქობულაძე და გიორგი შავლიძე.

"დაკავებულები დაშინებით, მუქარით, იძულებით, ე.წ. ქურდული გარჩევით, დანაშაულის ჩადენის წაქეზებითა და თავიანთი კრიმინალური გავლენის გამოყენებით, ელექტრონული კომუნიკაციის საშუალებით საქართველოს სხვადასხვა რეგიონში აქტიურად მონაწილეობდნენ ქურდული სამყაროს საქმიანობაში", - აცხადებენ შსს-ში.

შსს-ს ინფორმაციით, გამოძიებით გამოვლინდა:

  • რამაზ კობახიძე, ბადრი ქობულაძე და გიორგი შავლიძე მიმდინარე წლის 29 იანვარს, ბათუმში მოქალაქეს სიტყვიერი და ფიზიკური ძალადობის გამოყენებით, დიდ ოდენობით თანხის - 20 000 ლარის ე.წ. ქურდული სამყაროს საწევროში გადახდას აიძულებდნენ;
  • მინდია ლავასოღლი საზღვარგარეთიდან საქართველოს სხვადასხვა რეგიონში, მათ შორის ქალაქ ბათუმში, იმედა აბაშიძის, შოთა კეკელიძის, ივანე გიგიაძის, მარად წითელაძის, ჯამბულ ნაკაშიძის და ბეჟან დეკანაძის საშუალებით ახორციელებდა ე.წ. ქურდული სამყაროს საქმიანობას;
  • ე.წ. კანონიერი ქურდი ლავასოღლი, თავისი კრიმინალური გავლენის გამოყენებით, საზღვარგარეთიდან, სატელეფონო კომუნიკაციის საშუალებით, მის მიერ მართული ქურდული სამყაროს წევრის ივანე გიგიაძის მეშვეობით, 2018 წლის 17 ივნისს, ქალაქ ბათუმში დაუკავშირდა მოქალაქეს და ქურდულ სამყაროში თანხის ჩარიცხვის საკითხთან დაკავშირებით მოაწყო ე.წ. ქურდული გარჩევა.

გამოძიება ქურდული სამყაროს წევრობის, კანონიერი ქურდობის, ქურდულ შეკრებაში მონაწილეობის, გამოძალვისა და ძალადობის კვალიფიკაციით მიმდინარეობს.

შსს-ს ინფორმაციით, ბოლო ექვსი თვის განმავლობაში კანონიერი ქურდობის და ქურდული სამყაროს წევრობის ბრალდებით საქართველოში 20-მდე პირია დაკავებული. ასევე, ევროპის ქვეყნების სამართალდამცავ ორგანოებთან თანამშრომლობის შედეგად, საფრანგეთსა და საბერძნეთში დაკავებულია სხვადასხვა ორგანიზებულ-დანაშაულებრივი დაჯგუფების წევრი - საქართველოს 119 მოქალაქე და 9 ე.წ. კანონიერი ქურდი.