რუსეთში გამართულ მსოფლიო ჩემპიონატის ფინალისას, სტადიონზე კრემლის მოწინააღმდეგე ჯგუფის წევრები შეცვივდნენ. თამაშს ესწრებოდა რუსეთის პრეზიდენტი ვლადიმერ პუტინიც.

პოლიციის უნიფორმაში გამოწყობილი ოთხი აქტივისტი პანკ-ჯგუფის, ფუსი რაიოთის წევრები აღმოჩნდნენ. მათი მიზანი, მსოფლიოსთვის რუსეთის პოლიციის სახის ჩვენება იყო.

ჯგუფმა პოსტი ფეისბუქზე გამოაქვეყნა და ამით პასუხისმგებლობა აიღო. მათ უკანონო დაკავებების შეწყვეტა და პოლიტიკური პატიმრების გათავისუფლება მოითხოვეს.

ოთხივე აქტივისტი პოლიციამ დააკავა. მათ 160 საათით გამოსასწორებელი სამუშაო ან 185 დოლარის გადახდა ემუქრებათ. აქტივისტებს ბრალი აქვთ წარდგენილი მაყურებლის უფლებების დარღვევისა და პოლიციის უნიფორმის არალეგალურად ტარების მუხლებით.

ჯგუფმა ფეისბუქზე განაცხადა, რომ პოლიცია დაკავებულებთან 6 საათის შემდეგაც კი არ უშვებდა ადვოკატს.

როგორც ჯგუფის ფეისბუქ გვერდზე რამდენიმე წუთის წინ გამოქვეყნებული პოსტით ირკვევა, ფუსი რაიოთის ოთხი წევრი ამ დრომდე პატიმრობაში რჩება და ისინი სასამართლოს ელოდებიან. მათთან კვლავ არ უშვებენ ადოკატს და უცნობია, როდის და სად გაიმართება სასამართლო.