საქართველოს მთავარი პროკურორობის კანდიდატის შალვა თადუმაძის განცხადებით, საქართველოს პროკურატურა წლების განმავლობაში რეპუტაცია შელახული ინსტიტუტი იყო და ძალიან მარტივად პოლიტიკური დარტყმის ობიექტი გახდა. მისი თქმით, ადამიანებს, ხშირ შემთხვევაში უსამართლობის განცდა არა სასამართლოს, არამედ პროკურატურის მიმართ აქვთ.

"დღეს, გვაქვს პროკურატურა, რომელსაც 27-წლიან პერიოდში არასდროს ჰქონია ნდობის მაღალი ხარისხი და პოლიტიკური თავდასხმის ფარგლებშიც მაღალი ნდობა ვერ მოიპოვა", - განაცხადა შალვა თადუმაძემ იურიდიულ საკითხთა კომიტეტის სხდომაზე.

მთავარი პროკურორობის კანდიდატის თქმით, პროკურატურაში ახალი, სამართლიანობის ეტაპი უნდა დაიწყოს. მისი თქმით, საჯარო წყაროებიდან მოპოვებული ინფორმაციის საფუძველზე, საქართველოს პროკურატურაში სამართლიანობის მოთხოვნით 52 530 საჩივარია შეტანილი.

თადუმაძის აზრით, დღეს ჩამოყალიბებული სტრუქტურა მეტ-ნაკლებად უზრუნველყოფს სამართლიანობის აღდგენის პროცესს, თუმცა ტემპი არის დაბალი და არ არსებობს ადამიანური რესურსი, რომელიც საქმეზე გადაწყვეტილებას მიიღებს.

"სამწუხარო და არასერიოზული ტემპია. ამ სტრუქტურული ერთეულის მიღწევა არის წელიწადში 50 საქმე და თუ ამ ანგარიშს მივყვებით ჩვენ სამართლიანობას 1050 წლის შემდეგ აღვადგენთ", - განაცხადა შალვა თადუმაძემ.

მთავარი პროკურორობის კანდიდატის თქმით, რომელსაც პარლამენტში დასამტკიცებლად კენჭს უყრიან, პროკურატურაში სისტემური მიდგომა უნდა ჩამოყალიბდეს.

"ზოგადად, სისხლის სამართლის საქმეები უნიკალურია, მაგრამ ეს ის მოცემულობაა, როცა არ შეიძლება ამ სახით მივუდგეთ საქმის წარმოებას, გამომდინარე იქიდან, რომ მემკვიდრეობა არის მძიმე, გამოწვევა დიდი და მოლოდინი იმაზე დიდი", - განაცხადა თადუმაძემ.

მისი თქმით, სისტემურ მიდგომაში მოთხოვნებისა და შესაძლებლობების მიხედვით საქმეების კლასიფიცირებას გულისხმობს.

მთავარი პროკურორობის კანდიდატს შალვა თადუმაძეს დღეს, 16 ივლისს პარლამენტი კენჭს უყრის. საპროკურორო საბჭომ თადუმაძე მთავარი პროკურორობის კანდიდატად ერთსულოვნად აირჩია.

09:30 საათიდან შალვა თადუმაძეს იურიდიულ საკითხთა კომიტეტში უსმენენ. პარლამენტში კი რიგგარეშე სხდომა, რომელზეც პროკურორობის კანდიდატს კენჭი უნდა უყარონ, 12 საათზე დაიწყება.