ACT-ს კვლევის მიხედვით, თბილისში მცხოვრებთა უმრავლესობა, 77%, მიიჩნევს, რომ ბავშვის აღზრდისას პასუხისმგებლობა თანაბრად უნდა გადანაწილდეს ცოლ-ქმარზე. 22 პროცენტი მიიჩნევს, რომ ეს ვალდებულება დედას უფრო მეტად ეკისრება, 1 პროცენტი ფიქრობს, რომ - მამას.

გამოკითხულთა 63% ასევე ამბობს, რომ ქალმა და კაცმა თანაბრად უნდა უზრუნველყოს ოჯახის ფინანსური მდგომარეობა.

თბილისში ჩატარებული გამოკითხვის მიხედვით მოსახლეობის 58% მიიჩნევს, რომ ქალისათვის ოჯახის შესაქმნელად ყველაზე სასურველი ასაკი 25 წლიდან 30 წლამდეა, იგივე ასაკს ასახელებს რესპოდენტთა 70% კაცის დასაოჯახებლად ყველაზე ოპტიმალურ პერიოდად. ამის მიუხედავად, გამოკითხულთა მესამედზე მეტი მიიჩნევს, რომ ქალმა უფრო ადრე უნდა შექმნას ოჯახი, ვიდრე კაცმა.

კვლევა თბილისში ივნისის განმავლობაში ჩატარდა და პირისპირ გამოკითხა 400 მოქალაქე. კვლევის შესახებ გაიგეთ მეტი ACT-ის ვებ-გვერდზე.