კახეთის საინფორმაციო ცენტრი პანკისის სათემო რადიო WAY-ზე დაყრდნობით იუწყება, რომ სამართალდამცავებმა მუქარის შემცველი პოსტის ფეისბუკზე გამოქვეყნების გამო პანკისში, სოფელ დუისში 23 წლის ახალგაზრდა მამაკაცი რამდენიმე საათის წინ დააკავეს.

სახელმწიფო უსაფრთხოების სამსახურში On.ge-ს განუცხადეს, რომ გამოძიების ინტერესებიდან გამომდინარე ამ ეტაპზე დამატებით ინფორმაციას ვერ გასცემენ, თუმცა, ფაქტზე გამოძიება მიმდინარეობს, დამატებითი ცნობები კი მოგვიანებით გავრცელდება.

ფეისბუკის ერთ-ერთმა მომხმარებელმა გუშინ საღამოს გამოაქვეყნა აფეთქების ფოტო, რომელსაც რუსულად მიაწერა "ხვალ, 12:30-ზე, თბილისში ფეიერვერკი".

მუქარის შემცველი ფეისბუკ პოსტი ამ დროისათვის ხელმისაწვდომი არ არის. მომხარებელს საჯაროდ ატვირთული აქვს ტერორისტული ორგანიზაცია ისლამური სახელმწიფოს ქართველი მებრძოლის, თარხან ბათირაშვილის ორი ფოტო. სხვა საჯარო აქტივობა მის გვერდზე ხელმისაწვდომი არ არის. აღნიშნულ პირს ფეისბუკზე 37 მეგობარი ჰყავს, რომელთა ნაწილს მთავარ ფოტოდ დაჯგუფება ისლამური სახელმწიფოს დროშა აქვს დაყენებული.