ნიუ-იორკის პოლიციამ დააკავა ქალი, რომელიც აშშ-ის პრეზიდენტის, დონალდ ტრამპის პოლიტიკის გასაპროტესტებლად თავისუფლების ქანდაკებაზე აძვრა.

The New York Times ინფორმაციით, დაკავებულს ტერეზა ოკუმუ ჰქვია და ის მოძრაობა Rise and Resist-ის აქტივისტია. მან განაცხადა, რომ ქანდაკებიდან არ ჩამოვიდოდა, სანამ "ყველა ბავშვს არ გაათავისუფლებდნენ". ქალი ტრამპის "ნულოვანი ტოლერანტობის" პოლიტიკას გულისხმობს, რომლის მიხედვითაც აშშ-ის საზღვართან არალეგალ მიგრანტ ბავშვებს მშობლებს აშორებენ.

ინციდენტი აშშ-ის დამოუკიდებლობის დღეს, 4 ივლისს მოხდა. დღესასწაულის დროს თავისუფლების ქანდაკებას ტურისტების განსაკუთრებულად დიდი რაოდენობა სტუმრობს. მომხდარის გამო პოლიციამ თავისუფლების კუნძულიდან, სადაც განთავსებულია ქანდაკება, ყველა პირი გაიყვანა.

პოლიციის თანამშრომლები სამსაათიანი უშედეგო მოლაპარაკებების შემდეგ ქანდაკებაზე აძვრნენ და ქალი დააკავეს.