20 წელზე მეტი გავიდა მას შემდეგ, რაც ლას-ვეგასში სროლის დროს ამერიკელი რეპერი თუფაქი მოკლეს. მკვლელობის გარშემო კი, ახალი გარემოებები ცოტა ხნის წინ გახდა ცნობილი.

ნეტფლიქსის დოკუმენტურ ფილმში Unsolved: The Murders of Tupac and the Notorious B.I.G. რეპერმა Keefe D-მ აღიარა, რომ სროლის თანამონაწილე იყო და მკვლელობის დროს, ადგილზე იმყოფებოდა. მან ასევე თქვა, რომ მკვლელის ვინაობა მისთვის ყოველთვის იყო ცნობილი, თუმცა მის დასახელებისგან თავს იკავებდა.

"მე მაშინ ნარკომოვაჭრე ვიყავი და ერთადერთი ცოცხალი ადამიანი ვარ, ვისაც შეუძლია თუფაქის მკვლელობაზე სიმართლე მოყვეს. ადამიანები 20 წელია ითხოვენ ჩემგან პასუხების მიღებას, მაგრამ ლაპარაკი ახლა გადავწყვიტე, რადგანაც სიმსივნე მაქვს და დასაკარგიც აღარაფერი დამრჩა. ახლა მხოლოდ სიმართლე მადარდებს", - ამბობს რეპერი.

ის დასძენს, რომ სროლის დროს, მკვლელთან ერთად, თეთრ კადილაკში იჯდა, თუმცა მისი დასახელებისგან ის წლების განმავლობაში თავს იკავებდა. მისივე თქმით, მის უკან იჯდა მისი ბიძაშვილი და თუფაქის მკვლელობაში ბრალდებული ანდერსონი, ორ კრიმინალთან ერთად. გასროლა კი, სწორედ უკანა სავარძლიდან მოხდა.

თუფაქი 25 წლის იყო როდესაც მოკლეს. რეპერი სროლიდან ოთხ დღეში გარდაიცვალა.