ზაზა სარალიძე ამ დრომდე შინაგან საქმეთა სამინისტროს ეზოში რჩება. როგორც სარალიძემ On.ge-ს განუცხადა ის ღამე უწყების ეზოში აპირებს დარჩენას. მისივე თქმით, ამ დრომდე მას არავინ შეხვედრია და არც ტერიტორიის დატოვება მოუთხოვიათ.

სარალიძე შსს-ს ეზოში რვა საათზე მეტია მარტო იმყოფება. მისი მხარდამჭერები შსს-ს ეზოს გარეთ იკრიბებიან.

"აქ ვიქნები, სანამ კალანდიას არ დააკავებენ", - ასე განაცხადა ხორავას ქუჩაზე მოკლული მოზარდის მამამ მას შემდეგ, რაც კრიმინალური პოლიციის ხელმძღვანელთან შეხვედრა დატოვა.

"კრიმპოლის დირექტორს შევხვდი, რომელიც ისევე მიმტკიცებს, რომ მტკიცებულებები არ არსებობს და ვერ დავიჭერთ კალანდიასო, რომელიც არსებობს უკვე და ხელის დაფარება უნდათ", - განაცხადა სარალიძემ.

მისი თქმითვე, შინაგან საქმეთა მინისტრიც კრიმინალური პოლიციის ხელმძღვანლის პოზიციაზეა და სარალიძის მიერ მიცემული 1-თვიანი ვადის დარღვევის მიზანი საქმის გაყალბებაა.

დღეს, 2 ივლისს პარლამენტის საგამოძიებო კომისიამ შინაგან საქმეთა სამინისტროს რეკომენდაციით მიმართა ხორავას საქმის ფიგურანტის, მიხეილ კალანდიას წინააღმდეგ სისხლისსამართლებრივი დევნის დაწყების შესახებ. კომისიაში მიიჩნიათ, რომ შესაძლოა რომ კალანდია დავით სარალიძის ჯგუფურად მკვლელობის თანამონაწილეა.