შეიძლება ისპანახი თქვენი საყვარელი საჭმელი არ იყოს, მაგრამ დროა, მისი პოტენციალი სათანადოდ დავაფასოთ. MIT-ის (მასაჩუსეტსის ტექნოლოგიური ინსტიტუტის) მეცნიერებმა შეძლეს და ისპანახს ასაფეთქებელ ნივთიერებასთან კონტაქტის შემთხვევაში იმეილის გაგზავნა ასწავლეს.

მეცნიერებმა სპეციალური ტექნიკა შეიმუშავეს ნანოკარბონული სენსორების განსათავსებლად ფოთლების ქვედა მხარეს, სწორედ იმ შრეში, რომელშიც ფოტოსინთეზი წარმოებს. სენსორების ერთი ტიპი მუდმივ სიგნალს აგზავნიდა კომპიუტერზე, მეორე ტიპი კი მხოლოდ მაშინ აქტიურდებოდა, როცა მცენარის ფოთლებზე სამიზნე მოლეკულა ხვდებოდა. ამ გზით მკვლევარებმა იმის გარკვევა შეძლეს, როდის იყო ისპანახი ბუნებრივ მდგომარეობაში და როდის - ქიმიური ზემოქმედების ქვეშ.

იმ მომენტიდან, როცა ისპანახის ფესვები კონკრეტული ტიპის ქიმიურ ნივთიერებას შეეხო, ფოთლებამდე სიგნალის მისვლას დაახლოებით 10 წუთი დასჭირდა. ამის შემდეგ სენსორებმა ჩვეულებრივისგან განსხვავებული სიგნალი გააგზავნეს, რომელიც ინფრაწითელ კამერაზე აღიბეჭდა. კამერამ სმარტფონის ზომის კომპიუტერს შეტყობინება გადასცა, რის შემდეგაც მკვლევრებს ინფორმაცია ელექტრონული წერილის სახით მიუვიდათ.

"გვიხარია, რომ მცენარესა და ადამიანს შორის კომუნიკაციური ბარიერის აღმოფხვრა მოვახერხეთ", - განაცხადა ქიმიურმა ინჟინერმა მაიკლ სტრანომ.

ამავე ტექნოლოგიის გამოყენებით, შესაძლებელია დაბინძურების, მოულოდნელი ეკოლოგიური კატასტროფისა თუ გვალვის წინასწარმეტყველება.