სასაზღვრო პოლიციის უფროსის, თემურ კეკელიძის თქმით, რუსი სამხედროების მიერ დაკავებული ორი ქართველი მესაზღვრის, კობა მაჭარაშვილისა და გიორგი კერესელიძის მდგომაროება დამაკმაყოფილებელია. მისივე ცნობით, მათ მიმართ არ ჰქონია ადგილი არანაირ ძალადობას ან შეურაცხყოფას.

შსს-ს წარმომადგენელი ჰყვება, რომ საქართველო-დაღესტნის მონაკვეთზე ქართველი მესაზღვრეები საზღვრის ხაზთან შეაჩერეს რუსმა მესაზღვრეებმა და გადაიყვანეს გარკვევის მიზნით თავიანთ საგუშაგოზე. რუსული მხარის მტკიცებით, ადგილი ჰქონდა საზღვრის კვეთის დარღვევას.

კეკელიძის თქმით, მიმდინარეობს მესაზღვრეების გამოკითხვა, რითაც დადგინდება დაკავების მიზეზები:

"იყო თუ არა ეს მესაზღვრეების გატაცება, ვერც დავადასტურებ და ვერც უარვყოფ"

მხარეებს შორის მიღწეული შეთანხმების შედეგად, დაკავებული მესაზღვრეები დღეს, 29 ივნისს გაათავისუფლეს.

შინაგან საქმეთა სამინისტროს ცნობით, ლაგოდეხის სამმართველოს 2 მესაზღვრე 27 ივნისს, მიღებული გეგმიური დავალების შესაბამისად, საქართველო-რუსეთის ფედერაციის სახელმწიფო საზღვრის დაღესტნის მონაკვეთზე გავიდა, დროებითი საზაფხულო საგუშაგოს გასახსნელად.