საქართველოს ყოფილი პრეზიდენტი, მიხეილ სააკაშვილი თბილისის საქალაქო სასამართლოს გადაწყვეტილებას ეხმაურება, რომლის თანახმად, მას ვალერი გელაშვილის ცემის საქმეზე 6 წლით თავისუფლების აღკვეთა დაუსწრებლად მიესაჯა. ექს-პრეზიდენტის ვიდეომიმართვას ტელეკომპანია რუსთავი 2 ავრცელებს:

"სამართალთან ამას ისეთივე კავშირი აქვს, როგორც მე მარსის შემდგომ კვლევასთან. აი, ზუსტად ისეთივე კავშირში ვარ გელაშვილის ცემასთან, როგორც კენედის მკვლელობასთან, ტროცკის მკვლელობასთან და კალიგულას მოშორებასთან. შეუძლებელია, რომ ამ პროცესს ვუწოდო სამართლებრივი. ეს არის ჩვეულებრივი კლოუნადა".

მიხეილ სააკაშვილის თქმით, ვალერი გელაშვილის საქმის მთავარი მოწმე ნინო ბურჯანაძე იყო. სააკაშვილი მას საქართველოში "პუტინის კონკრეტულ მარიონეტს" უწოდებს:

"ასეთი ჩვენებები იციან პუტინთან კონკრეტული ვიზიტების შემდეგ. პოსტსაბჭოთა სივრცეში ყველაზე მეტად პუტინს ვაღიზიანებ მე. საქართველოში ივანიშვილი, ერთის მხრივ ასრულებს პუტინის დაკვეთას, რომელიც პუტინს საჯაროდ აქვს გაცხადებული, მეორეს მხრივ ცდილობს გაიხანგრძლივოს მის მიერ ქართველი ხალხის ძარცვა".

სააკაშვილის განცხადებით, ივანიშვილს არ სურს მისი საქართველოში დაბრუნება:

"ის გააკეთებს ყველაფერს, რომ მე, როგორც თანამედროვე ქართული სახელმწიფოს შემქმნელი, ვერ ჩამოვდიოდე საქართველოში".

დღეს, 28 ივნისს პროკურორმა არჩილ ტყეშელაშვილმა განაცხადა, რომ მოსამართლემ მიხეილ სააკაშვილი წარდგენილ ყველა ეპიზოდში, ყველა მუხლში სცნო დამნაშავედ:

"საქმეში იყო არაერთი მტკიცებულება, რომელიც მიანიშნებდა სააკაშვილის ბრალეულობაზე. მათ შორის იყო პარლამენტის ყოფილი თავმჯდომარის ჩვენებაც. შეხვედრისას მიხეილ სააკაშვილმა დაუდასტურა პარლამენტის თავმჯდომარეს, რომ ვალერი გელაშვილის ცემა შეურაცხმყოფელი სტატიის გამო განხორციელდა."

ვალერი გელაშვილზე თავდასხმის საქმეზე სასჯელს იხდის საქართველოს ყოფილი შინაგან საქმეთა მინისტრი, ვანო მერაბიშვილიც.