წილკანის და დუშეთის მთავარეპოსკოპოსმა, მეუფე ზოსიმემ სინოდის სხდომაზე შესვლის წინ განაცხადა, რომ სინოდს ბევრი საკითხი დაუგროვდა განსახილველი. კითხვაზე - რა საკითხებია პრობლემური ეკლესიაში, მეუფე პასუხობს, რომ ადამიანებს ჭირდებათ ნუგეში, რომელიც ეკლესიამ უნდა მისცეს.

"რაც უფრო მეტ სულიერ ნუგეშს მისცემს ეკლესია ხალხს, მით უფრო მშვიდობიანი ცხოვრება იქნება ჩვენთან. ალბათ ამ მიზანს ემსახურება დღევანდელი სხდომა."

მისი თქმით, ზუსტად არ იცის კონკრეტულად რა თემაზე იმსჯელებენ, თუმცა მისივე თქმით, შესაძლოა განიხილონ უკრაინის ავტოკეფალიის საკითხი. უკრაინის ავტოკეფალიის შესაძლო განხილვაზე ისაუბრა ვანისა და ბაღდათის მიტროპოლიტმა, მეუფე ანტონმაც.

უკრაინის ეკლესიის ავტოკეფალიის საკითხზე ვარაუდი საქართველოში რუსეთის საპატრიარქოს წარმომადგენლის ჩამოსვლამ გამოიწვია. სასულიერო პირი რუსულენოვანი მრევლისთვის იქადაგებს და საჭიროების შემთხვევაში რუსეთის ეკლესიის პოზიციას წარმოადგენს.

არსებობს მოსაზრება, რომ სხდომაზე განიხილავენ ციანიდის და მამა გიორგი მამალაძის საქმესაც. გარდა ამისა, სხდომის ერთ-ერთ საკითხად მიიჩნევა პატრიარქის მოსაყდრის, მეუფე შიოს ლეგიტიმაციის საკითხი და მისი თანამდებობიდან გადაყენება.

სინოდის წევრების თქმით, განხილული საკითხების შესახებ შეხვედრის შემდეგ ისაუბრებენ.