დღეს, 20 ივნისს პარლამენტის წინაშე გამოსვლისას პრემიერობის კანდიდატმა, მამუკა ბახტაძემ გუშინდელი გაერთიანებული კომიტეტების სხდომა და ოპოზიციის კრიტიკა შეაფასა. ბახტაძის თქმით, ახალი მთავრობა არ აპირებს ფოკუსირებას "ცხრა წელზე". თუმცა მისივე თქმით, უსაფუძვლო ბრალდებებს წინამორბედების სტატისტიკით უპასუხებენ.

"მე ნამდვილად, პირდაპირ და გულწრფელად გეუბნებით, ჩვენთვის და ჩვენი გუნდისთვის ის 9-წლიანი მმართველობის პერიოდი არ არის ორიენტირი, რაზეც გეზი უნდა ავიღოთ. ნამდვილად არ მინდა ისაუბრო წარსულზე, მე მინდა ვისაუბრო მომავალზე და იმ კონკრეტულ საქმეებზე, რაც უნდა გავუკეთოთ ქართველ ხალხს", - განაცხადა ბახტაძემ.

ბახტაძემ განაცხადა, რომ პროგრამაზე არგუმენტირებული შენიშვნები ვერ მოისმინა და ბრალდებების ნაწილი "ბუნებაში არ არსებობს".

"როდესაც ჩვენ ვისმენთ ისეთ უსაფუძვლო ბრალდებებს, როგორიც ეს იყო გუშინ, რა თქმა უნდა, გიპასუხებთ, თუ რა სტატისტიკა ჰქონდათ მაშინ ჩვენს წინამორბედებს და ძალიან გთხოვთ, ეს ყველაფერი უნდა მიიღოთ ისე, როგორც არის რეალურად", – განაცხადა მამუკა ბახტაძემ.

19 ივნისს კომიტეტების გაერთიანებულ სხდომებზე მინისტორბისა და პრემიერ-მინისტრობის კანდიდატებს უსმენდნენ. პრემიერობის კანდიდატმა 2018-2020 წლების სამთავრობო გეგმა წარადგინა.

ბახტაძემ განაცხადა, ამჟამინდელი მთავრობა ძველი შემადგენლობით არის დროებით. რამდენიმე კვირაში მომზადდება კანონპროექტი და სამინისტროების რაოდენობა 14-დან 11-მდე შემცირდება. ბახტაძის თქმით, მინისტრთა ახალი კაბინეტი სწორედ ამ პერიოდში დასახელდება.

გაიგეთ მეტი: