ოზურგეთის საკრებულოსთან ნაციონალური მოძრაობის წევრები საკრებულოს შენობაში შესვლის უფლებას ითხოვენ. ენმ-ის დეპუტატების განცხადებით, სამართალდამცავები შესასვლელის გადაკეტვით კანონით მინიჭებულ უფლებას უზღუდავენ. სამართალდამცავები კი აცხადებენ, რომ დეპუტატებს საკრებულოში პროვოკაციის თავიდან აცილების მიზნით არ უშვებენ.

აქციის მონაწილეები საკრებულოში შიმშილობის დაწყებას აპირებენ და მოითხოვენ ენმ-ის დეპუტატის, ბესიკ ქათამაძის ცემის საქმეზე დროულ გამოძიებასა და ქართული ოცნების წევრების პასუხისგებაში მიცემას.

ოზურგეთის საკრებულოსთან აქციები მესამე დღეა მიმდინარეობს. აქცია მას შემდეგ დაიწყო, რაც ნაციონალური მოძრაობის წევრებმა ქართული ოცნების წევრები ფიზიკურ ძალადობაში დაადანაშაულეს. მათი თქმით, ქათამაძეზე ფეისბუქპოსტების გამო იძალადეს და თავში რკინის საგანს ურტყამდნენ.

როგორც შსს-ში განმარტავენ, ოპერატიული გამოძიების შედეგად ბრალი წარედგინა ინციდენტში მონაწილე პირს, ქართული ოცნების დეპუტატს, ტარიელ აროშაძეს. შსს-ს ცნობით, ჩატარდება სხვა საგამოძიებო მოქმედებებიც.

გამოძიება საქართველოს სისხლის სამართლის კოდექსის 126-ე მუხლის 1-ლი ნაწილით მიმდინარეობს. ამ მუხლით სისხლისამართლებრივი პასუხისმგებლობა ცემის ან სხვაგვარ ძალადობის დროს დგება.