პრეზიდენტის საპარლამენტო მდივანი, ანა ნაცვლიშვილი ახალ პრემიერს, მამუკა ბახტაძეს იუსტიციის მინისტრის შეცვლისკენ მოუწოდებს. ნაცვლიშვილის თქმით, თეა წულუკიანის მინისტრთა კაბინეტში კვლავ შეყვანა იმის მაჩვენებელი იქნება, რომ პრემიერი მართლმსაჯულების სისტემის მძიმე მდგომარეობას არ აღიარებს.

"ადამიანები მართლმსაჯულების საძებნელად იძულებული არიან, გამოვიდნენ ქუჩაში და, ასევე, ძალიან ბევრი სხვა ფაქტი თუ შეფასება აჩვენებს, რამდენად მძიმე მდგომარეობაშია ჩვენი მართლმსაჯულების სისტემა. ამ პრობლემებს, პირველ რიგში, სჭირდება აღიარება",- ამბობს პრეზიდენტის საპარლამენტო მდივანი.

საქართველოს პრემიერ-მინისტრობის კანდიდატის, მამუკა ბახტაძის განცხადებით, მთავრობა პარლამენტში ნდობის გამოსაცხადებლად არსებული შემადგენლობით წარდგება. მისი განმარტებით, სამთავრობო ცვლილებები მას შემდეგ განხორციელდება, რაც მთავრობის შემადგენლობაში სტრუქტურული ცვლილებები შევა და კანონის დონეზე დამტკიცდება. მამუკა ბახტაძემ ჟურნალისტებს "პირობა მისცა", რომ ახალ მთავრობაში ახალი სახეები იქნებიან.