ხვალ, 19 ივნისს მთავრობის ნდობის გამოცხადების პროცედურები დაიწყება. ამის შესახებ ჟურნალისტებს საქართველოს პარლამენტის საპროცედურო საკითხთა კომიტეტის თავმჯდომარემ გიორგი კახიანმა განუცხადა.

დეპუტატმა მთავრობისთვის ნდობის გამოცხადების პროცედურული ნაწილი განიხილა და განმარტა, რომ 19 ივნისს საქართველოს პარლამენტში დილის 11 საათიდან საკომიტეტო მოსმენები დაიწყება.

გიორგი კახიანის თქმით, ხვალვე საპარლამენტო პოლიტიკური ჯგუფები სურვილის შემთხვევაში, დღის მეორე ნახევარში შეხვდებიან მთავრობის წევრებს. საკომიტეტო მოსმენების დასრულების შემდეგ, ოთხშაბათს, 20 ივნისის პლენარულ სხდომაზე პარლამენტი მთავრობის არსებულ შემადგებლობას ნდობას გამოუცხადებს.

კახიანის თქმით, მთავრობის დამტკიცების შემდეგ, უახლოეს მომავალში, მომზადდება ახალი კანონპროექტები, რომლითაც მთავრობის სტრუქტურაში ცვლილებები შევა.

"მას შემდეგ, რაც საკანონმდებლო ბაზა იქნება, ახალი მთავრობა ჩამოყალიბდება, რომელსაც ნდობას გამოვუცხადებთ", - განმარტა გიორგი კახიანმა.

მისი თქმით, გაცხადებული ინფორმაციაა, რომ ფინანსთა, ეკონომიკისა და საგარეო საქმეთა მინისტრები შეიცვლებიან.

საქართველოს პრემიერ-მინისტრობის კანდიდატის, მამუკა ბახტაძის განცხადებით, მთავრობა პარლამენტში ნდობის გამოსაცხადებლად არსებული შემადგენლობით წარდგება.

მისი განმარტებით, სამთავრობო ცვლილებები მას შემდეგ განხორციელდება, რაც მთავრობის შემადგენლობაში სტრუქტურული ცვლილებები შევა და კანონის დონეზე დამტკიცდება. მამუკა ბახტაძემ დააანონსა, რომ სამინისტროების რაოდენობა 14-დან 11-მდე შემცირდება.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა და ამის მიზეზად გუნდში არსებული აზრთა სხვადასხვაობა დაასახელა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.