უმრავლესობის ლიდერის, არჩილ თალაკვაძის განმარტებით ქართული პარტიის სხდომაზე მინისტრთა კაბინეტის შესახებ განხილვა არ ყოფილა.

მისივე თქმით, მთავრობის ახალ შემადგენლობაზე პარტია კონსულტაციებს პრემიერობის კანდიდატთან, მამუკა ბახტაძესთან ერთად გაივლის.

ფინანსთა მინისტრის მოვალეობის შემსრულებელი მამუკა ბახტაძე უმრავლესობამ პრემიერ-მინისტრობის კანდიდატად დაასახელა. ბახტაძის სავარაუდო კანდიდატურაზე მედიაში გიორგი კვირიკაშვილის გადადგომის შემდეგ საუბრობდნენ.

პროცედურულად, ქართულმა ოცნებამ მამუკა ბახტაძის კანდიდატურა პრეზიდენტს, გიორგი მარგველაშვილს დასამტკიცებლად უნდა წარუდგინოს, რომელსაც იგი უკვე პარლამენტს გადაუგზავნის განსახილველად.

შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტდეს.

გაიგეთ მეტი: