წიგნი "ნათელი ქრისტესი", რომლის მესამე ტომის 500 ასლად გამოცემა მთავრობის სარეზერვო ბიუჯეტს 254 ათასი ლარი დაუჯდა, არ გაიყიდება. პროექტის ავტორის, ნესტან კირთაძის თქმით, წიგნი სასაჩუქრედ დაიბეჭდა და წარჩინებულ პირებს გადაეცემა:

"მისი გაყიდვა უბრალოდ არ შეიძლება. ეს არის მთავრობის გადაწყვეტილებით გამოსული გამოცემა და მისი მფლობელები მხოლოდ ის წარჩინებული ადამიანები გახდებიან, ვისაც საქართველოს მთავრობა, კულტურის სამინისტრო და სრულიად საქართველოს კათოლიკოს პატრიარქი აარჩევენ", - განაცხადა კირთაძემ.

კირთაძის თქმით, წიგნი გადაეცემა ქვეყნის სტუმრებს, წარმატებულ სტუდენტებსა და მოსწავლეებს, ასევე საერთაშორისო მუზეუმებსა და უნივერსიტეტების ბიბლიოთეკებს.

7 იანვარს მაღაზია წიგნის სახლმა "ნათელი ქრისტესი საქართველოს" პირველი ორი ტომი გასაყიდად გამოიტანა და 3 000 ლარად შეაფასა. როგორც მაღაზიის მფლობელმა On.ge-ს განუცხადა წიგნი კერძო პირმა მიიტანა გასაყიდად და მხოლოდ ერთი ასლი ჰქონდა. მისივე თქმით, მაღალი ფასისა და საზოგადოებრივი რეაქციის გამო წიგნი მალევე ამოიღო გაყიდვიდან.

როგორც ნესტან კირთაძემ On.ge-სთან საუბარში აღნიშნა, წიგნზე საავტორო უფლება მხოლოდ მას და საქართველოს საპატრიარქოს ეკუთვნის. მისივე განმარტებით, გაყიდვის უფლება მხოლოდ მათ და წიგნის უშუალო მფლოფელებს აქვთ.