Yahoo-ს, როგორც დამოუკიდებელი კომპანიის, 21 წლიანი ისტორია დასრულდა. ამერიკული ტელეკომუნიკაციის კომპანია Verizon მას 4,83 მილიარდ აშშ დოლარად ყიდულობს. ინფორმაციას CNN ავრცელებს.

Yahoo ვერაიზონის კუთვნილ AOL-თან ინტეგრირდება. მისი გაყიდვის შემდეგ ასევე დასრულდება იაჰუს CEO-ს, მარისა მეიერის, მიერ კომპანიის გადარჩენის მცდელობა. ის კომპანიას 4 წლის წინ შეუერთდა და მისი გამოცოცხლების პირობა დადო.

Verizon და Yahoo ჯერჯერობით არ აკონკრეტებენ, ვინ გაუძღვება იაჰუს შეთანხმების დასრულების შემდეგ და დარჩება თუ არა ხელმძღვანელის პოზიციაზე მეიერი.

"მე დარჩენას ვგეგმავ, რადგან მიყვარს Yahoo და მჯერა ყველა ჩემი თანამშრომლის. ჩემთვის მნიშვნელოვანია კომპანიის ნახვა მისი არსებობის ახალ ეტაპზე" - წერს მეიერი Tumblr-ზე.

მარეგულირებლები Verizon-თან დადებულ შეთანხმებას განიხილავენ და პროცესი, სავარაუდოდ, მომავალი წლის დასაწყისში დასრულდება.

"ამით სრულდება იაჰუს ევოლუცია, რომელიც მან როგორც გავლენიანმა ვებ პორტალმა და პიონერმა საძიებო სისტემამ დაიწყო" - წერს CNN.

იაჰუს შესყიდვას Warren Buffett და The Daily Mail-იც გეგმავდა, თუმცა მას შემდეგ, რაც პროცესი თვეების განმავლობაში გაგრძელდა, თვეში მილიარდი აქტიური მომხმარებლის მქონე პორტალის ყიდვის გადაწყვეტილება ვერაიზონმა მიიღო.