უმრავლესობის დეპუტატებთან შეხვედრის შემდეგ, მეტროს მემანქანემ, რატი კაპანაძემ განაცხადა, რომ შეხვედრაზე რაიმე კონკრეტულ შეთანხმებებზე საუბარი არ ყოფილა. მისივე თქმით, მემანქანეები გააგრძელებენ გაფიცვასა და შიმშილს მანამ, სანამ კონკრეტულ შედეგებს არ მიაღწევენ.

"ვიმედოვნებთ, რომ შეთანხმება მოხდება დღეს, თუ ასე არ მოხდა, სამწუხაროდ ხვალ თბილისი მეტროპოლიტენის გარეშე დარჩება",- ამბობს რატი კაპანაძე.

მემანქანეებმა დეპუტატებთან გამართულ შეხვედრაზე მოლაპარაკების დაწყებისთვის მზადყოფნა გამოთქვეს. როგორც მემანქანემ ჟურნალისტებთან საუბრისას განაცხადა, გაფიცვამდე ყველაფრის მოლაპარაკების ფორმატში დატოვება სცადეს, თუმცა მეორე მხარის ხისტი განცხადებების საფუძველზე მოუწიათ მეტროპოლიტენის გაჩერება.

კაპანაძის თქმით, შეხვედრაზე მისული უმრავლესობის დეპუტატები შეეცდებიან, მეორე მხარესთან მიიტანონ მათი პრობლემები.

"ჩვენი შეთავაზება იყო, რომ ის ბარიკადი აიღონ, რომელიც გვაშორებს ჩვენს სამუშაო ტერიტორიაზე შესასვლელად და ქუჩაში გვიწევს გაფიცვის გამართვა. დასაწყისისთვის ეს კარგი გადადგმული ნაბიჯი იქნება",- განაცხადა კაპანაძემ.

მემანქანეების თქმით, მათთვის ჯერჯერობით, მოლაპარაკებების დაწყება და გაფიცვის დასრულება არ შეუთავაზებიათ და არც სატრანსპორტო კომპანია და თბილისის მერია გამოხმაურებია.

შეხვედრის შემდეგ, უმრავლესობის დეპუტატმა, ბექა ნაცვლიშვილმა განაცხადა, რომ მემანქანეები მზად არიან მოლაპარაკებებისთვის და თბილისის სატრანსპორტო კომპანიამ შეხმვედრი ნაბიჯი უნდა გადადგას.

მეტროს მემანქანეებმა გაფიცვა და შიმშილობა გუშინ დაიწყეს, რამაც დღეს, 4 ივნისს, მეტროს პარალიზება გამოიწვია. გაფიცვა ხელფასების ზრდას უკავშირდება. მეტროს მემანქანეები მოითხოვენ, რომ მათი თანამდებობრივი სარგო 45%-ით გაიზარდოს.

გაიგეთ მეტი: