თბილისის მერი კახა კალაძე პარლამენტის წინ განვითარებულ მოვლენებს, აქციას #ნუმომკლავ ეხმაურება და ამბობს, რომ კონკრეტული ძალები ამ თემით [ხორავას საქმით] მანიპულირებას ცდილობენ:

"ცდილობენ გარკვეული დესტაბილიზაციის შემოტანას ქვეყანაში. მინდა ვუთხრა ჩემი ქვეყნის მოსახლეობას, რომ რა თქმა უნდა, თავისუფლების გამოხატვისა და აზრის გამოხატვის უფლება ჩვენს ქვეყანაში ყველა ადამიანს აქვს, მაგრამ იმ პირებს, ვისაც სურთ ქვეყანაში დესტაბილიზაცია შემოიტანონ, ამის უფლებას არ მივცემთ. ხელისუფლება იქნება მოწოდების სიმაღლეზე და ვიმოქმედებთ კანონის ფარგლებში".

საქართველოს პარლამენტთან ზაზა სარალიძის მხარდამჭერი აქცია განახლდა. აქციის მთავარი მოთხოვნაა მთავრობის გადადგომა, სამართლიანობის აღდგენა და ხორავას ქუჩის საქმეზე მტკიცებულებების და დამნაშავეების დამალვაში მონაწილე პირების დასჯა. აქციას შეუერთდნენ, სტუდენტები, მოქალაქეები, მოსწავლეები, საზოგადო მოღვაწეები, პოლიტიკოსები და არასამთავრობოები.

გუშინ, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს და განზრახ მკვლელობიდან, მკვლელობის მცდელობად გადაკვალიფიცირდა.

განაჩენის გამოცხადების შემდეგ ზაზა სარალიძემ პროკურატურასთან აქცია გამართა და შოთაძის გადადგომა და საქმეში გარეული პირების დასჯა მოითხოვა. რამდენიმე საათში ირაკლი შოთაძე გადადგა.

პარლამენტის თავმჯდომარემ, ირაკლი კობახიძემ განაცხადა, რომ საქმეზე საპარლამენტო საგამოძიებო კომისია შეიქმნება. ეს არის პირველი შემთხვევა, როდესაც სისხლის სამართლის დაუსრულებელ საქმეზე საპარლამენტო საგამოძიებო კომისია იქმნება. პრემიერმა კი განაცხადა, რომ საქმეს შსს უკან იბრუნებს და გამოძიება განახლდება.