საქართველოს რაგბის კავშირი 2 დღის წინ მომხდარ ავარიაში დაშავებული მორაგბეებისა და მათი მეუღლეების შესახებ ცნობილ ბოლო ცნობებს აქვეყნებს.

რაგბის კავშირის სამედიცინო სამსახურის უფროსის და ეროვნული ნაკრების ექიმის გიორგი ჭუმბურიძის ინფორმაციით, დღეს მერაბ კვირიკაშვილი მრავლობითი დაჟეჟილობებით პალატაშია გადაყვანილი, მისი მდგომარეობა სტაბილურია და სიცოცხლისთვის საფრთხის შემცველი დაზიანებები არ აღენიშნება.

რაც შეეხება მისი მეუღლის ანი ბუაძის, მორაგბე გიორგი ლომინაძისა და მისი მეუღლის მდგომარეობას, ის კვლავ სტაბილურად მძიმეა. დაშავებული ქალები სამტრედიის საავადმყოფოდან ქუთაისის საავადმყოფოში გადაიყვანეს.

"სამივე იმყოფება მართვად სუნთქვაზე. ყველა პაციენტი ქუთაისშია. დღეს თბილისიდან ჩავა ყბა-სახის ქირურგი, რათა შეფასდეს სამივეს მდგომარეობა და დაიგეგმოს ყბა-სახის პირველადი ოპერაციები" - წერია ექიმის განცხადებაში.

ავარია 21 ივლისს, საღამოს მოხდა. ავტოსაგზაო შემთხვევას მეორე მანქანაში მჯდომი 3 ადამიანის სიცოცხლე ემსხვერპლა.

როგორც On.ge-ს რაგბის კავშირის მედია მენეჯერმა თათია ბერიაშვილმა უთხრა, სავარაუდოდ ვრცელდება ინფორმაცია, რომ მეორე მანქანაში მჯდომი ადამიანები მორაგბეებს და მათ მეუღლეებს არ იცნობდნენ.