საქართველოს მორაგბეთა ეროვნული ნაკრების წევრები მერაბ კვირიკაშვილი და გიორგი ლომინაძე მეუღლეებთან ერთად ავტოავარიაში მოყვნენ.

როგორც On.ge-ს რაგბის კავშირის მედია მენეჯერმა თათია ბერიაშვილმა უთხრა, კვირიკაშვილი სხვა დაშავებულებთან შედარებით ყველაზე კარგ მდგომარეობაშია:

"მერაბ კვირიკაშვილი გონზეა, დანარჩენ დაშავებულებთან შედარებით ყველაზე კარგ მდგომარეობაშია, მას ფილტვების დაჟეჟილობა და თავის ქალის ზედაპირული დაზიანება აქვს, მაგრამ სტაბილურად კარგად არის.

რაც შეეხება დანარჩენ სამ დაშავებულს, მეორე მორაგბე გიორგი ლომინაძე, მისი ცოლი და მერაბ კვირიკაშვილის ცოლი მძიმედ არიან და ჯერჯერობით გონზე არ მოსულან. ერთ-ერთ მათგანს თავში აქვს ჰემატომა".

თათია ბერიაშვილის თქმით, მედიამ არასწორი ინფორმაცია გაავრცელა მერაბ კვირიკაშვილის ცოლის ორსულობაზე:

"სინამდვილეში ორსულად გიორგი ლომინაძის ცოლია და არა მერაბ კვირიკაშვილის. აღსანიშნავია, რომ ქალების მდგომარეობა ყველაზე მძიმეა, თუმცა ექიმები ყველაფერს აკეთებენ მათ გადასარჩენად".

ამ დროისთვის, მერაბ კვირიკაშვილი და გიორგი ლომინაძე ქუთაისის საავადმყოფოებში არიან გადაყვანილნი, მათი მეუღლეები კი სამტრედიის საავადმყოფოში რჩებიან, რადგან მათი ჯანმრთელობის მდგომარეობიდან გამომდინარე, მათი გადაყვანა მიზანშეწონილი არაა.

ავარია გუშინ საღამოს მოხდა. ავტოსაგზაო შემთხვევას მეორე მანქანაში მჯდომი 3 ადამიანის სიცოცხლე ემსხვერპლა. თათია ბერიაშვილის თქმით, სავარაუდოდ ვრცელდება ინფორმაცია, რომ მეორე მანქანაში მჯდომი ადამიანები მორაგბეებს და მათ მეუღლეებს არ იცნობდნენ.