თბილისში სტუდენტები მსვლელობას მართავენ. აქციის მონაწილეები მოუწოდებენ საზოგადოებას შეუერთდნენ აქციას #ნუმომკლავ. ისინი სკანდირებენ: "გამოდით" და "აღსრულდეს სამართალი".

გუშინ, 31 მაისს დაწყებული აქცია დღეს, 4 საათზე განახლდა. აქცია იმართება საქართველოს სხვადასხვა ქალაქებში, მათ შორის, ბათუმში, ქობულეთში, ქუთაისში, ზუგდიდში, რუსთვში, თელავში, ახალციხეში.

გუშინ, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს და განზრახ მკვლელობიდან, მკვლელობის მცდელობად გადაკვალიფიცირდა.

განაჩენის გამოცხადების შემდეგ ზაზა სარალიძემ პროკურატურასთან აქცია გამართა და შოთაძის გადადგომა და საქმეში გარეული პირების დასჯა მოითხოვა. რამდენიმე საათში ირაკლი შოთაძე გადადგა.

პარლამენტის თავმჯდომარემ, ირაკლი კობახიძემ განაცხადა, რომ საქმეზე საპარლამენტო საგამოძიებო კომისია შეიქმნება. ეს არის პირველი შემთხვევა, როდესაც სისხლის სამართლის დაუსრულებელ საქმეზე საპარლამენტო საგამოძიებო კომისია იქმნება. პრემიერმა კი განაცხადა, რომ საქმეს შსს უკან იბრუნებს და გამოძიება განახლდება.